ខេត្តរតនគិរី៖ រថយន្តសេរីទំនើប ម៉ាកធុនត្រាមួយគ្រឿងពណ៌ស ពាក់ស្លាកលេខ ភ្នំពេញ 2AC.9217 ដែលត្រូវបានគេស្គាល់ឈ្មោះ ហឿង ខឿង អភិបាលស្រុកអូរជុំ បើកបរខុសបទដ្ឋានបច្ចេកទេសល្មើសនឹងច្បាប់ចរាចរណ៍ក្នុងផ្លូវបែកជាបួន បង្កឲ្យមានគ្រោះថ្នាក់ចរាចរណ៍នៅបណ្តាលក្រុងបានលុង។
ហេតុការណ៍ភ្ញាក់ផ្អើលគ្រោះថ្នាក់ចរាចរណ៍បានកើតឡើងកាលពីវេលាម៉ោង១២នឹង១០ថ្ងៃត្រង់ ថ្ងៃទី១០ ខែមករា ឆ្នាំ២០១៧នៅត្រង់ចំណុចផ្លូវបែកជាបួនទល់មុខការ៉ាស់សាំតេលា ស្ថិតនៅភូមិជ័យជំនះ សង្កាត់ឡាបានសៀក ក្រុងបានលុង ខេត្តរតនគិរី។
ប្រភពពីប្រជាពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុបានឃើញរថយន្តណាវ៉ារ៉ាពណ៌ស្ករ ពាក់ស្លាកលេខភ្នំពេញ2AD-1785 បើកបរតាមបណ្តោយផ្លូវជាតិលេខ៧៨ក្នុងទិសដៅពីលិចទៅកើតល្បឿនមធ្យម អ្នកបើកបរត្រូវបានគេស្គាល់ឈ្មោះ សេង ផាន់ណារ៉ា ភេទប្រុស មានទីលំនៅភូមិចែត្រ ឃុំឡាមិញ ស្រុកបកែវ ខេត្តរតនគិរី។
អ្នករួមដំណើរឈ្មោះ ឈិន ម៉េងហឿន(ប្រពន្ធនឹងកូនតូច)មានមុខរបរ គ្រូបង្រៀននៅស្រុកបកែវ ខណៈមកដល់ចំណុចកើតហេតុខាងលើ ត្រូវបានរថយន្តម៉ាកធុនត្រារបស់លោកស្រីអភិបាលស្រុកអូរជុំបើកបរក្នុងទិសដៅពីជើងទៅត្បូងក្នុងល្បឿនលឿន(ផ្លូវតូចបែកជាបួន)បានបុកទៅលើរថយន្តណាវ៉ារ៉ាយ៉ាងពេញទំហឹងតែម្តងចំជំហៀងខាងឆ្វេងធ្វើឲ្យរថយន្តណាវ៉ារ៉ាវិល៣ជុំ បែរក្បាលរថយន្តទៅលិចវិញខូចខាតយ៉ាងដំណំសំណាងល្អពុំបានប៉ះពាល់ដល់អាយុជីវិតមនុស្សនឹងអ្នកធ្វើដំណើរតាមដងផ្លូវ។
ក្រោយពេលកើតហេតុលោកស្រី អភិបាលស្រុកអូរជុំបើកទ្វារត់គេចខ្លួនបាត់ស្រមោល បន្សល់ទុករថយន្តនៅកន្លែងកើតហេតុត្រូវបានសមត្ថកិច្ចនគរបាលចរាចរណ៍ជើងគោកចុះមកអន្តរាគមន៍ធ្វើការវាស់វែងនាំយករថយន្តទាំង២គ្រឿងទៅរក្សាទុកនៅស្នងការដ្ឋាននគរបាលខេត្តដើម្បីដោះស្រាយតាមនិតិវិធីច្បាប់ចរាចរណ៍ ៕
ដោយ៖ វុទ្ធឦសាន
