ក្លិបយក្សអេស្ប៉ាញ Real Madrid បាន យល់ព្រមឲ្យក្លិបHeerenveenរបស់ប្រទេស ហុល្លង់ខ្ចីជើងខ្សែបម្រើប្រយុទ្ធសញ្ជាតិ ន័រវេសMartin Odegaardរយៈពេល១៨ខែ។

កីឡាករ Martin Odegaard បានផ្លាស់ ចេញពីក្រុម Stromsgodset មកកាន់ក្លិប Real Madrid តាំងពី នៅអាយុ១៦ឆ្នាំកាល ពី២ឆ្នាំមុន។ ពេលនោះOdegaardគឺជា ទិសដៅដ៏ចម្បងរបស់ក្លិបធំៗផ្សេងទៀត ដូចជាManchester United និង Liverpool ជាដើម ។
ប៉ុន្តែMartin Odegaardបានបង្ហាញខ្លួនក្នុងក្រុមឈុតធំReal Madrid បានតែ២ដង ប៉ុណ្ណោះ ខណៈដែលរូបគេអាចរកបាន៥ គ្រាប់ក្នុងចំណោម៦២ប្រកួតឲ្យក្រុម Real Madrid B ក្នុងក្របខ័ណ្ឌលំដាប់ទី៣នៃ ប្រទេសអេស្ប៉ាញ។

កីឡាករវ័យ១៨ឆ្នាំ Odegaard បាន ថ្លែងថា “Real Madrid គឺជាក្លិបធំនិងល្អ បំផុតរបស់ពិភពលោកហើយអ្នករាល់គ្នា ពិតជាដឹងហើយថាវាពិបាកណាស់ក្នុងការជាប់ជម្រើសដំបូងនៅទីនោះ។ ខ្ញុំមិនបាន សោកស្តាយទេដែលសម្រេចចិត្តទៅក្លិប Real Madrid ទោះបីជាគ្មានឱកាសលេង យ៉ាងហោចណាស់ខ្ញុំបានហ្វឹកហាត់ និង អភិវឌ្ឈខ្លួនច្រើនដែរ” ។

គួរបញ្ជាក់ថា Odegaard បានជាប់ ជម្រើសជាតិន័រវេសក្នុងឈុតធំពេលមានអាយុទើបតែ១៥ឆ្នាំ ហើយធ្លាប់បានលេងឲ្យក្រុមជម្រើសជាតិ៩ដងមកហើយ ៕

ដោយ៖ ដេវីត