ខេត្តកំពង់ឆ្នាំង៖ ជនសង្ស័យដែលជាអ្នកប្រើប្រាស់និងចែកចាយគ្រឿងញៀនចំនួន២នាក់ត្រូវបានសមត្ថកិច្ចកងរាជអាវុធហត្ថខេត្តកំពង់ឆ្នាំង ចាប់បានក្នុងពេលដែលជនសង្ស័យទាំង២នាក់នេះ ធ្វើសកម្មភាពពីកន្លែងផ្សេងគ្នានៅខេត្តកំពង់ឆ្នាំង ។

សមត្ថកិច្ចបានឲ្យដឹងថា ជនសង្ស័យដែលធ្វើការឃាត់ខ្លួនេះឈ្មោះរិន កុសល អាយុ២០ឆ្នាំ រស់នៅក្នុងភូមិទ្រាត្បូង ឃុំស្រែថ្មី ស្រុករលាប្អៀរ ខេត្តកំពង់ឆ្នាំង និងម្នាក់ទៀតឈ្មោះ អ៊ុច ភិរុណ ភេទប្រុស អាយុ២៤ឆ្នាំ រស់នៅសង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង ។

ក្នុងពេលឃាត់ខ្លួនសមត្ថកិច្ចបានរកឃើញមានថ្នាំញៀនប្រភេទម៉ាទឹកកកចំនួន១កញ្ចប់ ទូរស័ព្ទដៃចំនួន២គ្រឿង និងម៉ូតូ១គ្រឿង ។

សមត្ថកិច្ចបានឲ្យដឹងថា ការបង្រ្កាបជនសង្ស័យនេះគឺបន្ទាប់ពីសមត្ថកិច្ចទទួលបាននូវព័ត៌មានច្បាស់ការពីប្រជាពលរដ្ឋថា ជនសង្ស័យឈ្មោះរិន កុសល បានធ្វើសកម្មភាពប្រើប្រាស់គ្រឿងញៀន នៅក្នុងភូមិទ្រាត្បូង ពេលនោះសមត្ថកិច្ចបានដាក់កម្លាំងព័ទ្ធចាប់បាន ក្រោយពីសាកសួរចំលើយជនសង្ស័យឈ្មោះរិន កុសល សមត្ថកិច្ចបានឈានទៅឃាត់ខ្លួនជនសង្ស័យម្នាក់ទៀតឈ្មោះអ៊ុច ភារុណ ដែលជាអ្នកចែកចាយគ្រឿងញៀន ក្នុងពេលចាប់ខ្លួនសមត្ថកិច្ចបានឆែកឆេររកឃើញថ្នាំញៀនចំនួន១១កញ្ចប់ ដែលជនសង្ស័យរៀបចំធ្វើការចែកចាយបន្ត ។

ជនសង្ស័យទាំង២នាក់នេះ ត្រូវបានសមត្ថកិច្ចកងរាជអាវុធហត្ថកសាងសំណុំរឿង បញ្ជូនទៅតុលាការដើម្បីចាត់ការបន្តទៅតាមនីតិវិធី ។  ចន្ថា