ភ្នំពេញ៖ ជនសង្ស័យម្នាក់ត្រូវបានកម្លាំងសមត្ថកិច្ចខណ្ឌដង្កោធ្វើការឃាត់ខ្លួនពាក់ព័ន្ធករណីកាន់កាប់អាវុធដោយគ្មានការអានុញ្ញាត និងជួញដូរដោយខុសច្បាប់នូវសារធាតុញៀន កាលពីថ្ងៃទី២៣ ខែមករា ឆ្នាំ២០១៧ វេលាម៉ោង២និង១០នាទីរសៀលត្រង់ចំណុចផ្លូវជាតិ លេខ៣ ភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ ។

នគរបាលព្រហ្មទណ្ឌខណ្ឌដង្កោបានប្រាប់ឲ្យដឹងថា ជនសង្ស័យម្នាក់ដែលឃាត់ខ្លួនបានមានឈ្មោះស្រេង ពិសិដ្ឋ ហៅសិដ្ឋ ភេទប្រុស អាយុ៣៨ឆ្នាំ មុខរបរមិនពិតប្រាកដ ស្នាក់នៅភូមិទ្រា២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។

ចំណែកវត្ថុតាងចាប់យកមាន៖ ម៉ូតូ១គ្រឿងម៉ាកMSX ពណ៌សលាយខៀវ ពាក់ស្លាកលេខភ្នំពេញ1FI-4034, អាវុធខ្លីម៉ាកP08  លេខ1916 ១ដើម, គ្រាប់១គ្រាប់, ជញ្ជីងថ្លឹងថ្នាំញៀន១ និងទូរស័ព្ទដៃម៉ាកណូគា១គ្រឿង ។

ប្រភពពីនគរបាលព្រហ្មខណ្ឌដង្កោបានប្រាប់ឲ្យដឹងទៀតថា មុនពេលឈានដល់ឃាត់ខ្លួនជនសង្ស័យខាងលើ កម្លាំងប៉ុស្តិ៍នគរបាលរដ្ឋបាលក្រាំងពង្រ មានគ្នា៤នាក់ ជិះម៉ូតូ២គ្រឿង ល្បាតក្នុងមូលដ្ឋានសង្កាត់ក្រាំងពង្រ ដល់ចំណុចខាងមុខសួនឧហ្សាហកម្មវឌ្ឍនៈ ផ្លូវជាតិលេខ៣ ភូមិទឹកថ្លា សង្កាត់ក្រាំងពង្រ ខណ្ឌដង្កោ បានឃើញជនសង្ស័យ២នាក់ ទី១ឈ្មោះ ស្រេង ពិសិដ្ឋ ហៅសិដ្ឋ ភេទប្រុស ទី២ឈ្មោះ ង៉ុក ភេទប្រុស ជិះម៉ូតូ១គ្រឿង ដោយឌុបគ្នា និងបានជិះម៉ូតូព្យាយាមគេចពីគោលដៅចរាចរណ៍របស់ការិយាល័យចរាចរណ៍ផ្លូវគោករាជធានីភ្នំពេញ ។ ពេលឃើញដូចនេះសមត្ថកិច្ចយើងក៏បានហៅឲ្យឈប់ធ្វើការត្រួតពិនិត្យ ស្រាប់តែជនសង្ស័យឈ្មោះស្រេង ពិសិដ្ឋ ហៅសិដ្ឋ បានបោះអាវុធខ្លីម៉ាកP08 និងថ្នាំញៀនចូលទៅក្នុងប្រឡាយទឹក រួចរត់គេចខ្លួនពីសមត្ថកិច្ច និងបក្ខពួកម្នាក់ទៀតបានផ្តួលម៉ូតូរត់គេចខ្លួនដូចគ្នា ហើយសមត្ថកិច្ចនគរបាលខណ្ឌដង្កោបានធ្វើការឡោមព័ទ្ធចាប់បានជនសង្ស័យម្នាក់ខាងលើ រួមនិងវត្ថុតាងយកមកធ្វើការសាកសួរនៅប៉ុស្តិ៍នគរបាលរដ្ឋបាលក្រាំងពង្រតាមនីតិវិធីច្បាប់ ចំណែកជនសង្ស័យម្នាក់ទៀតបានរត់គេចខ្លួនបាត់ ។

ក្រោយពីឃាត់ខ្លួនរួចហើយជនសង្ស័យរួមនិងវត្ថុតាងខាងលើ ត្រូវបានសមត្ថកិច្ចបញ្ជូនបន្តទៅអធិកាដ្ឋាននគរបាលខណ្ឌដង្កោ ដើម្បីចាត់ការទៅតាមនីតិវិធីច្បាប់៕ ភារ៉ា ដង្កោ