ភ្នំពេញ៖ ការប្រកួតជម្រុះពានរង្វាន់ ជើងឯកប្រចាំទ្វីបអាស៊ី AFC Asian Cup UAE 2019 ដែលប្រទេសអារ៉ាប់រួមធ្វើជាម្ចាស់ផ្ទះបានបែងចែកពូលរួចហើយសម្រាប់វគ្គជម្រុះជុំទី៣។ ការបែងចែកពូលនេះបាន បង្ហាញលទ្ធផលថាក្រុមគោព្រៃកម្ពុជាស្ថិតក្នុងពូល C ដែលប៉ះសុទ្ធតែក្រុមខ្លាំងមានដូចជាក្រុមជម្រើសជាតិអាហ្វហ្គានីស្ថាន, វៀត ណាម និងហ្ស៊កដានីជាដើម ។

វគ្គជម្រុះជើងឯកទ្វីបអាស៊ីជុំទី៣នេះ ជាវគ្គជម្រុះចុងក្រោយគេហើយមានចំនួន២៤ក្រុម ចែកចេញជា៦ពូលនឹងត្រូវប្រកួតសន្សំពិន្ទុ។ ២ក្រុមដែលមានពិន្ទុលើគេក្នុងពូលនីមួយៗ មានឱកាសទៅប្រកួតនៅជុំផ្ដាច់ព្រ័ត្រ ។

គួរបញ្ជាក់ថា សម្រាប់ការប្រកួតបាល់ទាត់ជើងឯកទ្វីបអាស៊ីជុំផ្ដាច់ព្រ័ត្រមាន១២ក្រុមរង់ចាំរួចជាស្រេចដែលសុទ្ធតែជាក្រុមខ្លាំងៗហើយការប្រកួតជុំផ្ដាច់ព្រ័ត្រនឹងត្រូវធ្វើឡើងនៅប្រទេសអារ៉ាប់រួមជាម្ចាស់ផ្ទះ ក្នុងឆ្នាំ២០១៩ខាងមុខ៕ សារីម