ភ្នំពេញ៖ តារាសម្តែង និងពិធីករកូនកាត់ខ្មែរអ៊ីស្លាម លោក យ៉េប រ៉ហ្វាត ប្រឡូកក្នុងវិស័យសិល្បៈអស់រយៈពេល១៥ឆ្នាំមកហើយ។ ទោះបីជាមិនសូវមហាជនស្គាល់ច្រើន ប៉ុន្តែលោកត្រូវបានកម្មករ កម្មការិនីតាមបណ្តារោងចក្រជាច្រើន បានស្គាល់ ព្រោះតែលោកគឺជាផលិតករ និងពិធីករនៃកម្មវិធីអប់រំសុខភាពនៅតាមបណ្តារោងចក្រជាច្រើន។
ផ្តើមចេញពីអាជីពជាអ្នកសម្តែងកាលពីអំឡុង២០០២លោកបានចូលរួមសម្តែងក្នុងខ្សែភាព យន្តរឿង”ស្នេហ៍ដួងចន្ទ” និងព្យុះជីវិតយុវវ័យ” ។ ក្រៅពីការសម្តែងលោកក៏ជាជាពិធីករនៅតាមកម្មវិធីសិល្បៈមួយចំនួន ពិសេសលោកបានស្ម័គ្រចិត្តក្នុងការចូលរួមកិច្ចការងារសង្គមទាក់ទងនឹងសុខភាពផ្លូវភេទនៅតាមភោជនីយដ្ឋាន ខារ៉ាអូខេ និងនៅភូមិនានា។ នៅឆ្នាំ២០០៦ លោកបានក្លាយជាបុគ្គលិកបំពេញការងារផលិតគ្រប់គ្រងកម្មវិធីសិល្បៈអប់រំផ្សព្វផ្សាយសុខភាពសម្រាប់សមាគមសុខភាពរ៉ាក់នៅតាមបណ្តាខេត្តផងដែរ។
លោក យ៉េប រ៉ូហ្វាត បានលើកឡើងថា ក្នុងរយៈពេលបំពេញការងារសិល្បៈនិងគ្រប់គ្រងការផលិតកម្មនានាជាច្រើនកន្លងមកមានសិល្បករជាច្រើនដែលទទួលបានការបណ្តុះបណ្តាល ណែនាំពីលោករហូតទទួលបានកេរ្តិ៍ឈ្មោះបោះសំឡេងក្នុវិស័យសិល្បៈរហូតដល់បច្ចុប្បន្ន។
សិល្បករវ័យ៣៦ឆ្នាំរូបនេះ បញ្ជាក់ដែរថា ក្នុងឆ្នាំ២០១៥ លោកទទួលបានការគ្រប់គ្រងគម្រោងផលិតកម្មវិធីកម្សាន្តនិងអប់រំសុខភាពពីសមាគមសុខភាពរ៉ាក់ដែលគោលដៅធ្វើនៅតាមបណ្តារោងចក្រជាច្រើននៅភ្នំពេញហើយគម្រោងនេះកាន់តែរីកធំពីមួយឆ្នាំទៅមួយឆ្នាំ។ គម្រោងកម្មវិធីកម្សាន្តនេះទទួលបានការគាំទ្រកាន់តែច្រើនដែលសម្រាប់ឆ្នាំ២០១៧នេះលោកដាក់គោលដៅចុះផ្តល់ការកម្សាន្ត និងអប់រំសុខភាពនៅរោងចក្រប្រមាណ៤០ ស្មើរនឹង៨០កម្មវិធីនៅរាជធានីភ្នំពេញ និងខេត្តមួយចំនួនជិតរាជធានីភ្នំពេញ។ លោកថាក្នុងឆ្នាំ២០១៧នេះក៏នឹងមានវត្តមានសិល្បករសិល្បករិនីជាច្រើនដែលស្ម័គ្រចិត្តចូលរួមក្នុងកិច្ចការងារសង្គមនេះមានដូចជា លោក គូម៉ា កញ្ញា សុភ កុសុម៉ា កញ្ញា ស៊ូ ស៊ីរិកា កញ្ញា សុខ មុនីរក្សា កញ្ញា សុខ មុនីពិសី លោក នរៈ សិរីវិទ្យា លោក ផាត់ ពិដោរ លោក ប៉ែន សារ៉ាវជាដើម។
លោកបញ្ជាក់ដែរថា ក្រៅពីការងារជាពិធីករ និងជាអ្នកផលិតកម្មវិធីលោកក៏ឆ្លៀតពេលទំនេរចូលរួមសម្តែងក្នុងភាពយន្ត និងបទចម្រៀងខារ៉ាអូខេមួយចំនួនផងដែរ។ លោកថា បើទោះបីជាមិនមានស្នាដៃសិល្បៈជាដុំកំភួន និងមិនមានឈ្មោះបោះសំឡេងខ្លាំងក្នុងចង្កោមសិល្បៈប៉ុន្តែផលិតករខ្មែរអ៊ីស្លាមរូបនេះពិតថាមានមោទនភាពនិងការចូលរួមចំណែកក្នុងការងារបច្ចុប្បន្នដែលអាចជួយដល់សង្គម និងបណ្តុះគំនិតអ្នកសិល្បៈឲ្យចូលរួមពន្យល់និងផ្តល់ចំណេះដឹងនានាទាក់ទងនឹងសុខភាពផងដែរ៕ វឌ្ឍនា
