ភ្នំពេញ៖ ជនសង្ស័យ២នាក់ត្រូវប្រជាពលរដ្នចាប់បាននាំគ្នាវាយម្នាក់មួយដៃមួយជើងទើបប្រគល់ឲ្យកម្លាំងព្រហ្មទណ្ឌ៧មករា បន្ទាប់ពីធ្វើសកម្មភាពឆក់ទូរស័ព្ទដៃពីនារីម្នាក់បានសម្រេច កាលវេលាម៉ោង១១យប់ថ្ងៃទី២៥ ខែមករា ឆ្នាំ២០១៧ ស្ថិតតាមបណ្ដោយផ្លូវលេខ២៧៤ ក្នុងសង្កាត់បឹងព្រលិត ខណ្ឌ៧មករា រាជធានីភ្នំពេញ ។

ជនសង្ស័យមានឈ្មោះពិន កក្កដា ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះនៅម្ដុំព្រែកប្រា សង្កាត់ចាកអង្រែលើ ខណ្ឌមានជ័យ (ជាអ្នកបើកម៉ូតូ) និងម្នាក់ទៀតឈ្មោះ សៀក វេហា ភេទប្រុស អាយុ១៧ឆ្នាំ មុខរបរមិនពិតប្រាកដ ស្នាក់នៅផ្ទះនៅខេត្តតាកែវ (ជាអ្នកឆក់) ។ ចំណែកជនរងគ្រោះឈ្មោះ ជុំ ស្រីទូច ភេទស្រី អាយុ២៤ឆ្នាំ ស្នាក់ផ្ទះម្ដុំបឹងកេងកង សង្កាត់បឹងកេងកង២ ខណ្ឌចំការមន។

បើតាមប្រភពព័ត៌មានពីជនរងគ្រោះបានប្រាប់ឲ្យដឹងថា មុនកើតហេតុខ្លួនបានជិះម៉ូតូធំ១គ្រឿងទើបតែមកចេញពីផ្ទះមិត្តភក្តិនៅម្ដុំកោះពេជ្រខណៈពេលមកដល់ចំណុចផ្លូវកើតហេតុខាងលើក៏ស្រាប់តែមានជនសង្ស័យ២នាក់ជិះម៉ូតូ១គ្រឿងម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខភ្នំពេញ1GA-4895 ស្របទិសគ្នាមកពីក្រោយក៏ធ្វើសកម្មភាពឆក់ទូរស័ព្ទដៃ១គ្រឿងពីនារីម្នាក់ដែលនិយាយទូរស័ព្ទបានសម្រេចភ្លាមៗនោះក៏ត្រូវមានអ្នកធ្វើដំណើរតាមផ្លូវនិងជនរងគ្រោះបានដេញតាមពីក្រោយធ្វើឲ្យក្រុមជនសង្ស័យភ័យក៏ដួលម៉ូតូត្រូវប្រជាពលរដ្ឋដេញចាប់បានខណៈនោះក៏ត្រូវកម្លាំងព្រហ្មទណ្ឌ៧មករាមកដល់ក៏បានប្រគល់ជនសង្ស័យទាំង២នាក់យកទៅអធិការដ្នាននគរបាលខណ្ឌ៧មករាដើម្បើសួរនាំ។ ចំណែកទួរស័ព្ទដៃរបស់ជនរងគ្រោះត្រូវបានជនសង្ស័យបោះចោលនៅតាមផ្លូវផងដែរ។

បច្ចុប្បន្នជនសង្ស័យត្រូវបានកម្លាំងនគរបាលព្រហ្មទណ្ឌ៧មករាឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌ៧មករា ដើម្បីចាត់ការតាមនីតិវិធី៕ ស រស្មី