ភ្នំពេញ៖ ម្ចាស់ជ័យលាភីលេខ១ នៃកម្មវិធីប្រឡង Freshie ជំនាន់ទី១៥ លោក ទ្រី តារាវុធ ធ្លាប់បានធ្វើឲ្យគេចាប់អារម្មណ៍ខ្លាំង ក្រោយពីលោកបានចូលរួមសម្តែងក្នុងខ្សែភាពយន្តខ្នាតធំរបស់ផលិតកម្ម ឥន្ទ្រានិម្មិទរឿង “កំណត់ហេតុនាងនាថ”។ តារាសម្តែងរូបនេះ ក៏នឹងត្រៀមបង្ហាស្នាដៃធំពីរក្នុងឆ្នាំ២០១៧នេះ គឺការសម្តែងក្នុងភាពយន្តខ្នាតធំថ្មីមួយនឹងការងារជាពិធីករផងដែរ។

បើមិនមានការប្រែប្រួលទេ តំណែងជាតួឯកលើកដំបូងក្នុងភាពយន្តថ្មីមួយ នឹងត្រូវបានចាប់បានដោយតារាសម្តែងវ័យក្មេងរូបនេះ ក្រោយពេលតារារូបនេះ ទទួលបានចំណាត់ថ្នាក់លេខមួយ ពីកម្មវិធីប្រឡងល្បីឈ្មោះ Freshie Boy & Girl ជំនាន់ទី១៥ឆ្នាំ២០១៦ ។ តារារូបនេះបញ្ជាក់ថា ក្នុងពេលដ៏ខ្លីខាងមុខនេះលោកនឹងធ្វើឲ្យអ្នកគាំទ្រភ្ញាក់ផ្អើលជាមួយនឹងសមិទ្ធផលការងារសិល្បៈមួយចំនួន។

លោកថា នឹងចូលរួមសម្តែងខ្សែភាពយន្តខ្នាតធំថ្មីមួយរបស់ផលិតកម្ម ឥន្ទ្រានិម្មិទ។ លោកមិនបានបញ្ជាក់ចំណងជើងនៃខ្សែភាពយន្តនេះទេ ប៉ុន្តែ លោកលើកឡើងថា ខ្សែភាពយន្តក្នុងតំណែងតួឯកលើកដំបូងនេះ នឹងត្រូវចាប់ផ្តើមផលិតក្នុងអំឡុងពាក់កណ្តាលខែកុម្ភៈ ឆ្នាំ២០១៧នេះ។ តារាបង្ហាញម៉ូតរូបនេះលើកឡើងដែរថា កន្លងមកលោកធ្លាប់បានចូលរួមសម្តែងក្នុងខ្សែភាពយន្តមួយចំនួនដូចជា កំឡោះ៥១ក្រមុំ៣២ និងរឿង កំណត់ហេតុនាងនាថ ជាដើមដែលរឿងទាំងនោះមិនស្ថិតក្នុងតំណែងតួឯកនោះទេ។

លោកថា ក្រោយមើលសាច់រឿងថ្មីនេះ លោកគិតថា ប្លែកថ្មី ទាក់ទាញជាងរឿងមុនៗ។ តារាសម្តែងវ័យ២២ឆ្នាំរូបនេះបញ្ជាក់ថា លោកក៏ត្រៀមខ្លួនធ្វើជាពិធីករក្នុងកម្មវិធីប្រកួត Freshie Boy & Girl ឆ្នាំ២០១៧ខាងមុខផងដែរ។ លោកថាកម្មវិធីនេះ គឺជាព្រឹត្តិការណ៍ប្រកួតប្រជែងធំ និងល្បីឈ្មោះនៅកម្ពុជាអស់ជាច្រើនឆ្នាំមកហើយ ហើយឆ្នាំនេះ លោកនឹងក្លាយជាពិធីករសម្រាប់កម្មវិធីខាងលើនេះ ។

និស្សិតឆ្នាំទី៣ផ្នែកស្ថាបត្យកម្មរូបនេះលើកឡើងដែរថា ក្រោយពីបញ្ចប់ការថតខ្សែភាពយន្តរឿង កំណត់ហេតុនាងនាថ និងក្លាយជាម្ចាស់ជ័យលាភី Freshie Boy មក ក៏មានផលិតកម្មក្នុងស្រុកជាច្រើនបានទំនាក់ទំនងលោកឲ្យចូលរួមសម្តែងជាបន្តបន្ទាប់ ប៉ុន្តែដោយមិនមានពេលគ្រប់គ្រាន់ ទើបលោកមិនចង់ទទួលច្រើនដែលនាំឲ្យជាន់គ្នា ឬពិបាកក្នុងការបែងចែកពេលវេលា។

ទោះជាយ៉ាងណាក្រោយពីទទួលបានការងារថ្មីបន្តបន្ទាប់នេះ នឹងធ្វើឲ្យទស្សនិកជន និងអ្នកគាំទ្រលោកកាន់តែច្រើនទទួលយកស្នាដៃថ្មីៗរបស់លោក ហើយអ្វីដែលត្រៀមសម្រាប់ពេលនេះគឺការហ្វឹកហាត់បន្ថែមដើម្បីពង្រឹងសមត្ថភាព និងពង្រីកទីផ្សារសិល្បៈនៅពេលខាងមុខ៕ វឌ្ឍនា