ភ្នំពេញ៖ កម្លាំងអធិការនគរបាលខណ្ឌសែនសុខ បើកយុទ្ធនាការណ៍បង្ក្រាបអ្នកប្រើប្រាស់គ្រឿងញៀនហើយជាលទ្ធផលកម្លាំងខាងលើបានធ្វើការរឃាត់ខ្លួនមនុស្សចំនួន១១នាក់និងដកហូតម៉ូតូ១គ្រឿងផងដែរ កាលពីវេលាម៉ោង១១យប់ថ្ងៃទី២ ខែកុម្ភៈ ឆ្នាំ២០១៧ ត្រង់ចំណុចភូមិត្រពាំងឈូក សង្កាត់ទឹកថ្លា ខណ្ឌសែនសុខ ។

លោកម៉ក់ ហុង អធិការខណ្ឌនគរបាលខណ្ឌសែនសុខបានមានប្រសាសន៍ថា ដោយមានបទបញ្ជាពីលោកអគ្គស្នងការរងនិងជាស្នងការរាជធានីភ្នំពេញដោយមានការសម្របសម្រួលពីលោកព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញបាន បញ្ជាមកលោកឲ្យចុះសហការនិងធ្វើរដ្ឋបាលនៅចំណុចខាងលើដែលជាតំបន់ស្មុកស្មាញទើបលោកដឹកនាំកម្លាំងចុះមកបង្ក្រាបឲ្យដូចភ្លៀងរលឹម ក្នុងនោះឃាត់ខ្លួនអ្នកសង្ស័យប្រើប្រាស់គ្រឿងញៀនបានចំនួន១១នាក់ និងដកហូតម៉ូតូ១គ្រឿងផងដែរ យកទៅសាកសួរនៅអធិការដ្ឋាននគរបាលខណ្ឌសែនសុខ។

គួរបញ្ជាក់ថា នៅដើមឆ្នាំ២០១៧នេះ នគរបាលខណ្ឌសែនសុខបានបើកយុទ្ធនាការឲ្យដូចភ្លៀងរលឹមដោយចុះជាប់គ្នាទាំងយប់ទាំងថ្ងៃបានប្រមូលក្រុមក្មេងដែលតែងតែដើរចោរផ្ទះមកប្រមូលផ្តុំប្រើប្រាស់គ្រឿងញៀន និងខ្លះមកលេងល្បែងស៊ីសងខុសច្បាប់ជាច្រើននាក់ហើយទោះជានៅដើមឆ្នាំ២០១៧នេះ ខាងអគ្គស្នងការនគរបាលបានដាក់គោលការណ៍ត្រូវយកបញ្ហាគ្រឿងញៀនជាបញ្ហាចំបងក៏ដោយ តែសកម្មភាពចុះបង្ក្រាបនេះតែងតែកើតមានឡើងជារឿយៗ នៅក្នុងខណ្ឌសែនសុខនេះ។

បច្ចុប្បន្នក្រុមអ្នកសង្ស័យប្រើប្រាស់គ្រឿងញៀនរួមទាំងវត្ថុតាងខាងលើត្រូវបាននាំខ្លួនយកទៅធ្វើការសាកសួរនៅអធិការដ្ឋាននគរបាលខណ្ឌសែនសុខ៕ តុង សីហា