កីឡាករ Neymarតារាបាល់ទាត់ឆ្នើម របស់ក្លិប Barcelona បានថ្លែងថាមានពាន រង្វាន់ច្រើនណាស់ដែលចង់បានក្នុងអាជីពរបស់ខ្លួន ប៉ុន្តែមហិច្ឆតាធំបំផុតនោះគឺឈ្នះជើងឯកពិភពលោក(World Cup)ជាមួយ នឹងក្រុមជម្រើសជាតិប្រេស៊ីល ។

ខ្សែប្រយុទ្ធវ័យ២៥ឆ្នាំរូបនេះបាននិយាយ ក្នុងបទសម្ភាសន៍ផ្ដាច់មុខជាមួយសារព័ត៌មាន Red Bull Content Poolថា “វាពិតជាកិត្តិយសធំធេងណាស់សម្រាប់ខ្ញុំ… វាជា សុបិនមួយដែលខ្ញុំកនៅលេងឲ្យក្រុមជម្រើស ជាតិប្រេស៊ីលរកគ្រាប់បាល់ និងជួយក្រុម ឲ្យល្អបំផុតតាមដែលអាចធ្វើបាន” ។

Neymar ក៏បានបញ្ជាក់បន្ថែមថា “ខ្ញុំ សង្ឃឹមថានឹងអាចបន្តស៊ុតបាល់បញ្ចូលទីបានច្រើនទៀត ហើយបំបែកកំណត់ត្រាថ្មីដែលធ្វើឲ្យខ្ញុំសប្បាយចិត្តខ្លាំងបំផុត។ ខ្ញុំ មិនចង់លេងល្អជាងកីឡាករដទៃទេ តែខ្ញុំគ្រាន់តែចង់ឲ្យខ្លួនឯងលេងកាន់តែប្រសើរឡើងប៉ុណ្ណោះ។ ខ្ញុំមិនមែនអន្ទះសាទេ ប៉ុន្តែខ្ញុំបានគិតរួចហើយពីពាន World Cup។ ខ្ញុំដូចជាកំពុងយល់សប្តិខ្ញុំមិនអាចឈប់ គិតឈប់ស្រមៃថាឈ្នះពាននោះវាអស្ចារ្យយ៉ាងណាទៅ…តែខ្ញុំនឹងព្យាយាមអ៊ីចឹង ហើយខ្ញុំអាចត្រៀមខ្លួនរួចរាល់សម្រាប់ឆ្នាំ ២០១៨” ។

គួររំលឹកថា កាលពីឆ្នាំ២០១៤ Neymar មិនអាចជួយក្រុមប្រេស៊ីលលើកពានរង្វាន់ ដ៏អស្ចារ្យលើទឹកដីខ្លួនឯងបានឡើយ ព្រោះ មានរបួសញាំញីច្រើន ហើយខកខានការប្រកួតវគ្គពាក់កណ្ដាលផ្ដាច់ព្រ័ត្រជាមួយ ឥន្ទ្រីដែកអាល្លឺម៉ង់ទៀត។ ប៉ុន្តែគាត់បានសម្រេចជោគជ័យក្នុងការជួយឲ្យក្រុមកីឡា បាល់ទាត់ប្រេស៊ីលទទួលបានមេដាយមាស ក្នុងព្រឹត្តិការណ៍កីឡាអូឡាំពិក២០១៦។ បន្ទាប់មករូបគាត់បានព្យាយាមពង្រឹងសមត្ថ ភាពជាមួយក្រុមយក្សអេស្ប៉ាញ Bacelona ដើម្បីត្រៀមខ្លួនសម្រាប់ព្រឹត្តិការណ៍ World Cup នៅប្រទេសរុស្ស៊ីនាឆ្នាំ២០១៨៕ ដេវីត