តាមរបាយការណ៍របស់ឧត្តមស្នងការអង្គការសហប្រជាជាតិទទួលបន្ទុកសិទ្ធិ មនុស្សដែលទើបចេញផ្សាយនៅឆ្នាំ ២០១៧ ថា ករណីរំលោភ ធ្វើឃាតកុមារ ចាប់ជំរិត ជាដើម គឺជាឧក្រិដ្ឋកម្មប្រឆាំងនឹងមនុស្សជាតិ។

អំពើហិង្សាទាំងនោះបានធ្វើឲ្យពលរដ្ឋប្រមាណ ៦៦.០០០នាក់ បានរត់គេចទៅប្រទេសបង់ក្លាដែសជិតខាងបន្ថែមពីលើ ជនជាតិរ៉ូហ៊ីងយ៉ាជាង២២.០០០នាក់ ដែលបានភៀសខ្លួនពីប្រទេសមីយ៉ាន់ម៉ាដើម្បីគេចពីការធ្វើទុក្ខបុកម្នេញពីសំណាក់ទាហាន។ អង្គការសហប្រជាជាតិបាន ប្រមូលភស្តុតាង និងសក្ខីកម្មរបស់ជនជាតិរ៉ូហ៊ីងយ៉ានៅប្រទេសបង់ក្លាដែសជា លក្ខណៈបុគ្គលបានជាង២០០នាក់ គិត ចាប់តាំងពីខែតុលា ឆ្នាំ២០១៦មក។ នេះបើតាមបើតាមបេសកជនពិសេសនៃឧត្តមស្នងការអង្គការសិទ្ធិមនុស្សអង្គការសហប្រជាជាតិ លោកស្រី Linnea Arvidsson ដែលប្រចាំនៅប្រទេសមីយ៉ាន់ម៉ាបាន បង្ហើបឲ្យដឹង។

សម្រាប់អង្គការសហប្រជាជាតិយុទ្ធនាការរបស់យោធាមុីយ៉ាន់ម៉ាប្រឆាំងនឹង សហគមន៍ជនជាតិភាគតិចរ៉ូហ៊ីងយ៉ាកាន់សាសនាអ៊ិស្លាមកាលពីខែតុលាកន្លងទៅនៅតំបន់ព្រំដែនខាងជើងប្រទេសទំនងជាបានធ្វើឲ្យមានមនុស្សស្លាប់អស់ជាច្រើន រយនាក់ក្នុងរយៈពេលតែប្រមាណ៤ខែ ប៉ុណ្ណោះ។ ឧត្តមស្នងការការពារសិទ្ធិ មនុស្សរបស់អង្គការសហប្រជាជាតិបាន អំពាវនាវឱ្យអាជ្ញាធរបញ្ឈប់ជាបន្ទាន់នូវ នយោបាយសាបព្រោះអំពើឃោរឃៅនេះ៕

ប្រែសម្រួល៖ ម៉ែវ សាធី