ភ្នំពេញ៖ មុខសញ្ញាប្រើប្រាស់ និងជួញដូរគ្រឿងញៀនយ៉ាងសកម្មម្នាក់ និងថ្នាំញៀន១៣កញ្ចប់ រួមជាមួយដាវសាមូរ៉ៃ១ដេីមត្រូវបានសមត្ថកិច្ចខណ្ឌមានជ័យធ្វើការឃាត់ខ្លួនក្រោយចុះធ្វើរដ្ឋបាល កាលពីវេលាម៉ោង១១និង១៥នាទីព្រឹកថ្ងៃទី ១០ ខែកុម្ភៈ ឆ្នាំ២០១៧ ស្ថិតនៅភូមិដំណាក់ធំៗ សង្កាត់ស្ទឹងមានជ័យ ខណ្ឌមានជ័យ។

ប្រតិបត្តិការនេះដឹកនាំកម្លាំងដោយលោក ហួរ ម៉េងវ៉ាង អធិការរងខណ្ឌមានជ័យ សហការជាមួយលោក ម៉ៅ សាវឿន មេប៉ុស្ដិ៍នគរបាលរដ្ឋបាលស្ទឹងមានជ័យ ក្រោយពីបានចុះរដ្ឋបាលនៅទីតាំងខាងលើ ហើយបានធ្វើការឆែកឆេរនូវបន្ទប់ជួលរបស់ជនសង្ស័យមានឈ្មោះ យូ ហេង ភេទប្រុស អាយុ២១ឆ្នាំ មុខរបរពិតប្រាកដ ស្នាក់នៅភូមិកើតហេតុខាងលើ ក៏បានរកឃើញនូវគ្រឿងញៀន៥កញ្ចប់ធំ និង៨កញ្ចប់តូច រួមជាមួយដាវសាមូរ៉ៃ១ ជញ្ជីងសម្រាប់ថ្លឹងថ្នាំ២ និងសម្ភារជក់មួយចំនួនទៀតនៅក្នុងបន្ទប់ជួលរបស់ជនសង្ស័យខាងលើ។

បន្ទាប់ពីធ្វើការឆែកឆេររួចមកខាងសមត្ថកិច្ចបាននាំយកជនសង្ស័យ រួមជាមួយនិងវត្ថុតាងមកប៉ុស្ដិ៍នគរបាលរដ្ឋបាលស្ទឹងមានជ័យ ដើម្បីធ្វើការសាកសួរ និងកសាងសំណុំរឿងបញ្ជូនទៅកាន់អធិការរដ្ឋាននគរបាលខណ្ឌមានជ័យដើម្បីចាត់ការបន្តតាមនីតិវិធីច្បប់៕ ភារ៉ា ដង្កោ