ខេត្តមណ្ឌលគិរី ៖ កម្លាំងកងរាជអាវុធហត្ថលើផ្ទៃប្រទេសចុះប្រតិបត្តិការបង្ក្រាបបទល្មើសព្រៃឈើទ្រង់ទ្រាយធំ ឈានដល់ការឃាត់ខ្លួនជនជាតិវៀតណាម៧នាក់ និងចាប់យករថយន្តរ៉េវដឹកឈើ៨គ្រឿង។
ប្រតិបត្តិការបង្ក្រាបបទល្មើសព្រៃឈើខាងលើនេះបានធ្វើឡើងកាលពីវេលាម៉ោង៥និង០០នាទីព្រឹកថ្ងៃទី២២ ខែកុម្ភះ ឆ្នាំ២០១៧ ដឹកនាំដោយលោកឧត្តមសេនីយ៍ឯក ហុង វិណុល មេបញ្ជាការរងកងរាជអាវុធហត្ថលើផ្ទៃប្រទេសទទួលបន្ទុក ព័ត៍មាន និងស្រាវជ្រាវបង្ក្រាបបទល្មើស ក្រោមការបញ្ជាដោយផ្ទាល់ពីនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ ជាមេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មាធិការជាតិបង្ក្រាបបទល្មើសធនធានធម្មជាតិ។ ជាក់ស្តែងកម្លាំងបានឃាត់ខ្លួនជនជាតិ វៀតណាម៧នាក់ ចាប់យករថយន្តរ៉េវ រថយន្តបាកុងដឹកឈើ៨គ្រឿង ដោយឡែកពលរដ្ឋខ្មែរចំនួន៥នាក់ ជាអ្នកចូលទៅកាប់ឈើធ្វើដងកាំបិទ រើសជំនៀឈើ និងជាជាងធ្វើស្នាក់ការប៉ុស្តិនគរបាលការពារព្រំដែនអូរហ៊ុច ត្រូវបានប្រគល់អោយអាជ្ញាធរ សមត្ថកិច្ច និងជំនាញបរិស្ថានធ្វើការអប់រំ រួចអោយពួកគាត់ត្រឡប់ទៅផ្ទះវិញ។
មុនឈានដល់ការបង្ក្រាបបទល្មើសព្រៃឈើជាក់ស្តែង គឺកម្លាំងសម្ងាត់បានទទួលព័ត៍មានថាមានក្រុមឈ្មួញវៀតណាមបានប្រើប្រាស់រថយន្តបាកុង រថយន្តរ៉េវ និងត្រាក់ទ័រប្រមាណជាង៤០គ្រឿង ជាមួយនិងកម្មករជិត១០០នាក់ចូលមកកាប់ផ្តួល និង ដឹកឈើក្នុងទឹកដីខ្មែរតាមច្រករបៀងអូរហ៊ុច ឋិតនៅចំណុចឃុំស្រែខ្ទុម ស្រុកកែវសីមា ជាប់ស្រុកអូររាំង ខេត្តមណ្ឌលគិរី ក្នុងនោះមានសមត្ថកិច្ចនគរបាល យោធាការពារព្រំដែន យកលុយពីឈ្មួញវៀតណាម មកចាត់ចែងរត់ការជាមួយអាជ្ញាធរ សមត្ថកិច្ច ជំនាញជាច្រើនស្ថាប័ននៅខេត្តមណ្ឌល គិរី ដើម្បីចូលកាប់ឈើ ប្រមូល ដឹកជញ្ជូនឈើក្នុងទឹកដីខ្មែរ។ សកម្មភាពបទល្មើសព្រៃឈើនេះផងដែរគឺគេរៀបចំជាលក្ខណះប្រព័ន្ធ ក្នុងនោះថែមទាំងអោយមានការឈូសឆាយផ្លូវចេញពីចំណុចខាងក្រោយស្នាក់ការបរិស្ថានជាសំងាត់និងលាក់លៀម រហូតដល់ច្រកអូរហ៊ុចចំងាយជាង១០គីឡូម៉ែត្រ ជាមធ្យោបាយសម្រាប់អោយកម្មករវៀតណាមចូលមកអារផ្តួលរលំឈើហ៊ុបមូល អោយរថយន្តបាកុង រថយន្តរ៉េវ ត្រាក់ទ័រវៀតណាមចូលមក ប្រមូល ដឹកជញ្ជូនឈើក្នុងទឹកដីខ្មែរយកទៅវៀតណាម។ ករណីនេះរត់ការនៅខេត្តមណ្ឌលគិរីជាមួយអាជ្ញាធរ សមត្ថកិច្ច ជំនាញជាច្រើនស្ថាប័ន ពិសេសនគរបាល យោធាការពារព្រំដែនជិតមួយលានដុល្លារ។
លោកឧត្តមសេនីយ៍ត្រី អេង ហុី អ្នកនាំពាក្យកងរាជអាវុធហត្ថលើផ្ទៃប្រទេសបានអោយដឹងថា៖ កម្លាំងរបស់យើងបង្ក្រាបក្នុងបទល្មើសជាក់ស្តែងជាបឋម កម្លាំងបានឃាត់ខ្លួនជនជាតិវៀតណាម៧នាក់ ចាប់យករថយន្តរ៉េវ រថយន្តបាកុងដឹកឈើ៨គ្រឿង ដោយឡែកពលរដ្ឋខ្មែរចំនួន៥នាក់ ជាអ្នកចូលទៅកាប់ឈើធ្វើដងកាំបិទ រើសជំនៀឈើ និងជាជាងធ្វើស្នាក់ការប៉ុស្តិនគរបាលការពារព្រំដែនអូរហ៊ុច ត្រូវបានប្រគល់អោយអាជ្ញាធរ សមត្ថកិច្ច និងជំនាញបរិស្ថានធ្វើការអប់រំ រួចអោយពួកគាត់ត្រឡប់ទៅផ្ទះវិញ។ លោកបន្តថា៖ បច្ចុប្បន្នសមត្ថកិច្ចកំពុងសាកសួរជនសង្ស័យជាជនជាតិរៀតណាមទាំង៧នាក់តាមនីតិវិធី ដើម្បីកសាងសំណុំរឿងទៅសាលាដំបូងខេត្ត ឈានដល់ការស្រាវជ្រាវជនពាក់ព័ន្ធបទឧក្រិដ្ឋបំផ្លាញព្រៃឈើនៅខេត្តមណ្ឌលគិរីនេះ ៕ ដោយ៖ សុខ ខេមរា
