ភ្នំពេញ៖ នៅព្រឹកថ្ងៃទី២៥ ខែកុម្ភៈ ឆ្នាំ២០១៧នេះ ដោយឆ្លៀតពីម៉ោងរដ្ឋបាល លោក សុខ ពេញវុធ អភិបាល នៃគណៈអភិបាលខណ្ឌដូនពេញ និងជាប្រធាន ស.ស.យ.កខណ្ឌ បានដឹកនាំមន្ត្រីរដ្ឋបាលខណ្ឌ សមាជិក សមាជិកា ស.ស.យ.ក ខណ្ឌ និងកម្លាំងប្រជាការពារខណ្ឌដូនពេញ សរុប២៨០នាក់ដេីររេីសសំរាម និងបាញ់លាងសំអាតច្រាំងទន្លេចាប់ពីមុខផ្សាររាត្រីរហូតដល់ក្រោយសាលសន្និសីទចតុមុខ ដេីម្បីឲ្យច្រាំងទន្លេមានសោភ័ណ្ឌភាពបន្ថែមទៀត។

ក្នុងយុទ្ធនាការនោះលោកអភិបាល បានសំណូមពរដល់មហាជនគ្រប់ស្រទាប់វណ្ពៈមេត្តាចូលរួមសហការ កុំបោះសំរាមចោលក្រៅធុងសំរាម ត្រូវមានការភ្ញាក់រលឹកថា «ទីក្រុងភ្នំពេញជាទីក្រុងយើងទាំងអស់គ្នា»។

លោកអភិបាលបានបញ្ជាក់ថា សំរាមគឺជាឃាត.កលាក់មុខ «សម្លាប់ប្រជាពលរដ្ឋដោយមិនដឹងខ្លួន» ដូច្នេះក្នុងនាមអាជ្ញាធរក៏បានអំពាវនាវដល់ប្រជាពលរដ្ឋជួយថែរក្សាអនាម័យឲ្យបានទាំងអស់គ្នា ដើម្បីកាត់បន្ថយសំរាម ហើយត្រូវចោលសំរាមក្នុងធុង មិនត្រូវចោលពាសវាលពាសកាលនោះទេ ហើយក៏មិនត្រូវដាក់បន្ទុកទៅភាគីណាដែរ។ ប្រសិនបើពលរដ្ឋមិនចូលរួមនោះទេ ទោះបីសាលាធានី និងស្ថាប័នពាក់ព័ន្ធ ខំបង្កើតសមត្ថភាពប៉ុណ្ណាក៏មិនឈ្នះក្នុងការប្រមូលនោះដែរ បើគ្មានការចូលរួមពីពលរដ្ឋដែលជាអ្នកបោះចោលគ្មានសណ្តាប់ធ្នាប់នោះ៕ ស តារា