ក្រោយរយៈពេលមួយខែដែលបាន បញ្ចប់អាណត្តិប្រធានាធិបតី លោក អូបាម៉ា ទើបតែបានបង្ហាញខ្លួនជាសាធារណៈនៅលើដងផ្លូវមួយក្នុងទីក្រុងញូវយ៉កបង្កភាពភ្ញាក់ផ្អើលយ៉ាងខ្លាំងដល់ពលរដ្ឋ និងអ្នកសារព័ត៌មានចោមរោមសួរ។ ពល រដ្ឋជាច្រើនបានលើកដៃស្វាគមន៍ការមក ដល់របស់លោក អូបាម៉ា និងបង្ហាញពី ក្តីស្រឡាញ់ចំពោះអតីតប្រធានាធិបតី ដដែល។

ពលរដ្ឋរាប់រយនាក់បាននាំគ្នាប្រមូលផ្តុំនៅមុខអគារដែលលោក អូបាម៉ា បាន ចូលទៅដោយមានបំណងចង់ជួបលោក។ ពលរដ្ឋស្រែកហ៊ោកញ្ជ្រៀវបង្ហាញពីក្តី ស្រឡាញ់ និងការស្វាគមន៍យ៉ាងកក់ក្តៅ បំផុតនៅពេលដែលលោក អូបាម៉ា ធ្វើ ដំណើរពីអគារទៅកាន់ក្បួនរថយន្ត។ ក្នុង រូបភាពដូចដើមលោក អូបាម៉ា ពាក់អាវធំ ពណ៌ខ្មៅ ក្នុងស ដៃកាន់កែវកាហ្វេ លើកដៃស្វាគមន៍អ្នកគាំទ្រមុនពេលចាកចេញ។

សារព័ត៌មាន Business Insider បាន ផ្សាយថា គោលដៅនៃការធ្វើដំណើរទៅ កាន់ទីក្រុងញូវយ៉ករបស់លោក អូបាម៉ា មិនទាន់ដឹងនៅឡើយ ហើយតំណាងរបស់អតីតប្រធានាធិបតីក៏មិនពិភាក្សាអ្វីជុំវិញ បញ្ហាខាងលើនោះដែរ។

ក្រោយរយៈពេល១ខែដែលលោក អូបាម៉ា ចាកចេញពីសេតវិមាន លោកត្រូវបានគេបោះឆ្នោតជ្រើសរើសជាប្រធានា ធិបតីល្អលំដាប់ទី១២ ក្នុងចំណោមអតីតប្រធានាធិបតីទាំង៤៤រូប។ ក្រុមអ្នក ឯកទេសបញ្ជាក់ថាលោក អូបាម៉ា ធ្វើការ បានល្អនៅលើវិស័យជាច្រើន និងមានប្រវត្តិ រូបល្អ។

ដោយសារតែមានប្រវត្តិរូបល្អទើប អតីតប្រធានាធិបតីអាមេរិកលោក បារ៉ាក់ អូបាម៉ា ទទួលបានការស្រឡាញ់គាំទ្រពី ពលរដ្ឋបារាំង។ មិនត្រឹមតែប៉ុណ្ណោះ ពល រដ្ឋបារាំងបានស្នើឲ្យលោក អូបាម៉ា ទៅធ្វើជាប្រធានាធិបតីដឹកនាំបារាំងវិញម្តង៕

ប្រែសម្រួល៖ ម៉ែវ សាធី