អនុប្រធានាធិបតីប្រទេសវេណេហ្ស៊ុយអេឡាលោក Tareck El Aissami បាន ចោទប្រកាន់អាមេរិកថា បានចាប់ផ្តើមបង្កសង្គ្រាមប្រឆាំងប្រទេសអាមេរិកខាងត្បូងមួយនេះ។ ជាមួយគ្នានោះលោកបានចោទប្រកាន់ក្រុមប្រឆាំង ដែលបានគាំទ្រដល់ សកម្មភាពរបស់សេតវិមានបំពានលើអធិបតេយ្យរបស់ប្រទេសខ្លួន។

ឆ្លើយតបទៅនឹងបទសម្ភាសន៍ជាមួយ បណ្តាញទូរទស្សន៍ជាតិវេណេហ្ស៊ុយ អេឡា អនុប្រធានាធិបតី El Sissami បានចោទប្រកាន់ក្រសួងហិរញ្ញវត្ថុអាមេរិកថាបានចូលរួមក្នុងគម្រោងប្រឆាំងរដ្ឋាភិបាលវេណេហ្ស៊ុយអេឡា។ ជាមួយគ្នានោះ លោកបានច្រានចោលរាល់ការចោទប្រកាន់របស់សេតវិមាន ថាលោកបានជាប់ពាក់ ព័ន្ធនឹងការជួញដូរគ្រឿងញៀន។

ប្រតិកម្មខាងលើកើតឡើងក្រោយពេលដែលក្រសួងហិរញ្ញវត្ថុអាមេរិកពេលថ្មីៗនេះបានអនុម័តការដាក់ទណ្ឌកម្មទៅលើ អនុប្រធានាធិបតី វេណេហ្ស៊ុយអេឡា ដោយចោទប្រកាន់ថាមានជាប់ពាក់ព័ន្ធនឹងការជួញដូរគ្រឿងញៀនពីវេណេហ្ស៊ុយ អេឡាចូលទៅអាមេរិក។

អនុប្រធានាធិបតីខាងលើបានបញ្ជាក់ថា ព័ត៌មានខាងលើគឺជាការចោទប្រកាន់ដោយគ្មានហេតុផល ហើយលោកក៏មិន ដែលមានគណនីធនាគារណាមួយនៅ អាមេរិកនោះដែរ។ កន្លងមករដ្ឋាភិបាលទីក្រុងវ៉ាស៊ីនតោនបានប្រកាសបង្កកទ្រព្យសម្បត្តិទាំងអស់របស់អនុប្រធានាធិបតី វេណេហ្ស៊ុយអេឡា ហើយហាមប្រាម លោកចូលទឹកដីអាមេរិកទៀតផង ក្រោយចោទប្រកាន់ថាលោកបានបញ្ជូនកូកាអុីនទៅអាមេរិក។

អនុប្រធានាធិបតី El Aissami គឺជា មន្ត្រីជាន់ខ្ពស់របស់វេណេហ្ស៊ុយអេឡាត្រូវបានអាមេរិកដាក់ទណ្ឌកម្ម ដោយសារតែជាប់ពាក់ព័ន្ធនឹងរឿងរ៉ាវជាច្រើន ក្នុងនោះមានទាំងវិបត្តិនយោបាយនៅក្នុងប្រទេសផងដែរ៕

ប្រែសម្រួល៖ ម៉ែវ សាធី