ខេត្តស្ទឹងត្រែង ៖ សិស្សសាលាស្រី២នាក់ និងអ្នកបង្កហេតុបានរងរបួសធ្ងន់ បន្ទាប់ពីបុរសម្នាក់បើកបរលឿន ជាន់ហ្រ្វាំងមិនជាប់ បណ្តាលឲ្យបុក ត្រូវ បានបញ្ជូនទៅមន្ទីរពេទ្យភ្លាមៗ ។ ហេតុការណ៍នេះបានកើតឡើង នៅវេលាម៉ោង៦ និង៥៤នាទី ព្រឹកថ្ងៃទី៣ ខែមីនា ឆ្នាំ២០១៧ លើកំណាត់ផ្លូវជាតិ លេខ៧៨ ត្រង់ចំណុចមុខសាលារៀនបឋមសិក្សាច្រប់ ស្ថិតក្នុងភូមិច្រប់ ឃុំក្បាលរមាស ស្រុកសេសាន ខេត្តស្ទឹងត្រែង ។
តាមសាក្សីបានឲ្យដឹងថា មុនពេលកើតហេតុ គេបានឃើញបុរសម្នាក់បានជិៈម៉ូតូ១គ្រឿង ម៉ាកហុងដាសេ១២៥ ជិះចេញពីខេត្តរត្តនគិរី ក្នុងល្បឿន យ៉ាងលឿន ។ លុះបើកមកដល់ចំណុចកើតហេតុ មុខសាលារៀនបឋមសិក្សាច្រប់ ក៏វាក់អើជាមួយនឹងម៉ូតូសិស្សសាលាជិៈឌុបគ្នា បម្រុងបត់ចូល សាលា ។ តែដោយសារជនបង្ក ជិះក្នុងល្បឿនលឿនជាន់ហ្វ្រាំងមិនជាប់ ក៏បណ្តាលឲ្យបុកពីក្រោយយ៉ាងពេញទំហឹង ធ្វើអោយសិស្សសាលាស្រីទាំង ២នាក់រងរបួសចំក្បាល និងអ្នកបង្កក៏រងរបួស ត្រូវបានដឹកបញ្ជូនមកកាន់មន្ទីរពេទ្យខេត្តដើម្បីជួយសង្គ្រោះ។
នគរបាលប៉ុស្តិ៍ឃុំក្បាលរមាសបានអោយដឹងថា នារីរងគ្រោះទី១-ឈ្មោះ ហេន ឌីរក្សា អាយុ១៥ឆ្នាំ រៀនថ្នាក់ទី៧ និងទី២-ឈ្មោះហ្វយ ចាន់នំ អាយុ ១៨ឆ្នាំ ជាសិស្សរៀននៅសាលាបឋមសិក្សាច្រប់ ។ អ្នកទាំង២នាក់រស់ ភូមិស្រែស្រណុក ឃុំក្បាលរមាស ស្រុកសេសា ខេត្តស្ទឹងត្រែង ។ ចំណែក បុរសបង្កហេតុឈ្មោះ ជួន សុខគួរ៉ា អាយុ២៨ឆ្នាំ រស់នៅភូមិរាជានុកូល សង្កាត់-ក្រុង-ខេត្តស្ទឹងត្រែង និងកំពុងសម្រាកព្យាបាលនៅមន្ទីរពេទ្យបង្អែក ខេត្ត ។
ដោយឡែកមធ្យោបាយធ្វើដំណើរទាំង២គ្រឿងត្រូវបានកម្លាំងនគរប៉ុស្តិ៍យកមករក្សាទុក ដើម្បីដោះស្រាយតាមនីតិវិធី៕ ជាយក្រុង
