ភ្នំពេញ៖ សមត្ថកិច្ចខណ្ឌសែនសុខបានឃាត់ខ្លួនសង្សារមួយគូដកហូតថ្នាំញៀន១កញ្ចប់តូចខណៈពួកគេកំពុងសម្ងំប្រើប្រាស់គ្រឿងញៀននៅក្នុងបន្ទប់ជួល។

ការឃាត់ខ្លួននេះធ្វើឡើងកាលពីវេលាម៉ោង១០និង១០នាទីយប់ថ្ងៃទី៣ ខែមីនា ឆ្នាំ២០១៧ នៅចំណុចក្នុងបន្ទប់ផ្ទះជួលម្ដុំផ្សារក្រមួន ក្នុងភូមិពោងពាយ សង្កាត់ភ្នំពេញថ្មី ខណ្ឌសែនសុខ។

ជនសង្ស័យទី១មានឈ្មោះ ហួរ បូរ៉ា ភេទប្រុស អាយុ៣១ឆ្នាំ មុខរបរបើកឡាន ស្នាក់នៅផ្ទះជួល សង្កាត់បឹងកក់១ ខណ្ឌទួលគោក និងទី២មានឈ្មោះ ម៉េង ស្រីលក្ខណ័ ភេទស្រី អាយុ២២ឆ្នាំ មុខរបរនារីខារ៉ាអូខេ ស្នាក់នៅផ្ទះជួលជាមួយគ្នា(កន្លែងកើតហេតុ) មានស្រុកកំណើតសង្កាត់ជ្រោយចង្វា ខណ្ឌជ្រោចង្វា។

តាមប្រភពព័ត៌មានពីសមត្ថកិច្ចបានឲ្យដឹងថា ដោយមានប្រជាពលរដ្ឋដែលនៅក្បែរកន្លែងកើតហេតុនោះបានរាយការណ៍មកថាមានក្រុមក្មេងស្ទាវជាច្រើននាក់កំពុងពួនសម្ងំប្រើប្រាស់គ្រឿងញៀននៅក្នុងផ្ទះជួលខាងលើទើបកម្លាំងសមត្ថកិច្ចមូលដ្ឋានសហការជាមូលកម្លាំងប្រជាការពារខណ្ឌសែនសុខចុះធ្វើការឆែកឆេរបន្ទប់ជួលខាងលើហើយឈានដល់ការឃាត់ខ្លួនជាក់ស្ដែងនៅក្នុងបន្ទប់ជួលនោះបានជនសង្ស័យប្រុសស្រី២នាក់ ហើយដកហូតថ្នាំញៀន១កញ្ចប់តូច ឧបករណ៍ប្រើប្រាស់គ្រឿងញៀនមួយចំនួន និងម៉ូតូម៉ាកMSX មួយគ្រឿងពាក់ស្លាកលេខ ភ្នំពេញ 1FX-8360 ផងដែរ។

បច្ចុប្បន្នជនសង្ស័យទាំង២នាក់រួមនិងវត្ថុតាងកំពុងឃាត់ខ្លួននៅអធិការដ្ឋាននគរបាលខណ្ឌសែនសុខដើម្បីកសាងសំណុំរឿងចាត់ការតាមនីតិវិធី ៕ តុង សីហា