ភ្នំពេញ៖ បុរសម្នាក់បានរត់ទៅប្តឹងសមត្ថកិច្ចប៉ុស្តិ៍ចោមចៅបន្ទាប់ពីយករថយន្តទៅផ្ញើកន្លែងបញ្ញើរ២៤ម៉ោងទីធ្លាដីវាលជិតតារាងបាល់ទាត់ខាងលិចផ្ទះជួលដំបូលខៀវស្រាប់តែព្រឹកឡើងមកមើលរថយន្តស្រាប់តែមិនឃើញរថយន្កក៏ផ្អើលឆោឡោ។

ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង៥ព្រឹកថ្ងៃទី៩ ខែមីនា ឆ្នាំ២០១៧ នៅដីវាលខាងលិចផ្ទះជួលដំបូលខៀវ ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ រហូតមកដល់វេលាម៉ោង៨និង៣០នាទីព្រឹកថ្ងៃដដែលទើបទៅប្តឹងសមត្ថកិច្ច។

បុរសដែលបាត់រថយន្តនោះមានឈ្មោះឡាយ ចិន្តា អាយុ៣២ឆ្នាំ មុខរបរលក់ទឹកសុទ្ធ ស្នាក់នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតឃុំញ៉ែងញ៉ង ស្រុកត្រាំកក់ ខេត្តតាកែវ។ ចំណែករថយន្តដែលត្រូវចោរលួចយកទៅនោះម៉ាកភីកអាប់ប្រភេទដឹកទំនិញធុនតូច ពណ៌ស ពាក់ស្លាកលេខភ្នំពេញ2D-0996។

ប្រភពព័ត៌មានពីសមត្ថកិច្ចឲ្យដឹងថា នៅមុនពេលកើតហេតុគឺកាលពីយប់ថ្ងៃទី៨ ខែមីនា ឆ្នាំ២០១៧ ជនរងគ្រោះខាងលើបានចតរថយន្តទុកនៅកន្លែងតារាងបាល់ទាត់ដែលជាកន្លែងបញ្ញើរ២៤ម៉ោងនៅកន្លែងកើតហេតុខាងលើ ហើយដើរទៅបន្ទប់ជួលបាត់ លុះម៉ោង៥ជាងព្រឹងថ្ងៃទី៩ ខែឆ្នាំដដែល ស្រាប់តែមិនឃើញរថយន្តក៏មានការភ្ញាក់ផ្អើលតែម្តង។

ក្រោយពេលកើតហេតុជនរងគ្រោះមកប្តឹងសមត្ថកិច្ចប៉ុស្តិ៍ចោមចៅឲ្យជួយអន្តរាគមន៍៕ សុខា សែនជ័យ