ភ្នំពេញ ៖ តុលាការបានកោះហៅព្រះតេជគុណ ប៊ុត ប៊ុនតិញ ស្ថាបនិកបណ្តាញព្រះសង្ឃឯករាជ្យ ចូលបំភ្លឺលើកទី៣ នាព្រឹកថ្ងៃទី១៧ ខែមីនា ឆ្នាំ២០១៧ តាមបណ្តឹងរបស់លោកលោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ ។ ប៉ុន្តែដល់ថ្ងៃកំណត់ ព្រះតេជគុណប៊ុត ប៊ុន តិញ ពុំបានចូលបង្ហាញខ្លួននោះទេ ។
ពាក់ព័ន្ធករណីនេះ ពុំទាន់អាចសុំការបញ្ជាក់ពីលោក លី សុផាណា អ្នកនាំពាក្យអយ្យការអមសាលាដំបូងរាជធានីភ្នំពេញ បានទេ ដោយសារលោកជាប់រវល់សវនាការ ។
ប្រភពព័ត៌មានបញ្ជាក់ថាសំណុំរឿងនេះ ស្ថិតក្រោមចំណាត់ការរបស់លោក ស្រី ម៉ាកនី ព្រះរាជអាជ្ញារងអមសាលាដំបូងរាជធានីភ្នំពេញ ។
នាពេលកន្លងទៅ លោក ម៉ម សូណង់ដូ ថ្លែងថា ព្រះតេជគុណ ប៊ុត ប៊ុនតិញ បានបង្កើតសេណារីយ៉ូមួយបង្ខូចកេរ្ដិ៍ឈ្មោះលោកនិងគណ បក្ស ព្រមទាំងអ្នកគាំទ្រដែលការចោទប្រកាន់នេះមិនអាចទទួលយកបានឡើយ ។ លោកថា ព្រះតេជគុណ ប៊ុត ប៊ុនតិញ និយាយតែ ផ្តេសផ្តាស ហើយគួរសឹកធ្វើនយោបាយឲ្យបានពេញលេញតែម្ដងទៅ ។
ក្នុងពាក្យបណ្ដឹង លោក ម៉ម សូណង់ដូ បញ្ជាក់ថា កាលពីថ្ងៃទី៣០ ខែមេសា ឆ្នាំ២០១៦ ព្រះតេជគុណ ប៊ុត ប៊ុនតិញ បានផុសខ្សែវីដេអូមួយ ដែលបង្ហាញពីរូបព្រះអង្គ ដែលកំពុងថ្លែងអត្ថាធិប្បាយ វិភាគនយោបាយ និងសង្គម។ នៅក្នុងបទអត្ថាធិប្បាយនោះ ព្រះអង្គបានមានបន្ទូល ចោទមកលើរូបលោក និងភរិយា ថា “…បែរទៅជាតា ម៉ម សូណង់ដូ មកចរចាថ្លៃគ្នា សូមឲ្យប្រពន្ធគាត់ ឈរជាតំណាងរាស្ត្រ មុនគាត់ ហើយគាត់ចង់ចាំតំណែង ធំជាងនោះទៀត ប៉ុន្តែនៅក្នុងគណបក្សសង្គ្រោះជាតិ នៅពេលនោះ បានព្រមព្រៀងគ្នា ជួយជ្រោមជ្រែងឲ្យលោកតា ម៉ម សូណង់ដូ ទៅឈរជាតំណាងរាស្ត្រ ខេត្តក្រចេះ ប៉ុន្តែលោកតា ម៉ម សូណង់ដូ គាត់ចង់បានទាំងពីរ ប្រពន្ធផង ប្តីផង ហេតុដូច្នេះ គណបក្សសង្គ្រោះជាតិ មិនព្រម ទើបធ្វើឲ្យតា ម៉ម សូណង់ដូ អាក់អន់ស្រពន់ចិត្ត មិនចូលរួមក្នុងបក្សមួយរយៈ…ខ្សែវីដេអូនេះ បានរក្សាទុក នៅក្នុងគណនីហ្វេសប៊ុក របស់ព្រះតេជគុណ ប៊ុត ប៊ុនតិញ រហូតមកដល់សព្វថ្ងៃ” ៕ ដោយ ៖ ចេស្តា
