ខេត្តពោធិ៍សាត់ ៖ បុរសម្នាក់បានដាច់ខ្យល់ស្លាប់ភ្លាមៗនៅនឹងកន្លែង ខណៈត្រូវបានគេអះអាងថា ដោយសារអារផ្ដួលរំលំដើមឈើមួយដើមធំ ហើយបានភ្លាត់ស្នៀតត្រូវបានមែកឈើវ័ធបោកចំលើចិញ្ចើមខាងស្តាំនោះ។
ហេតុការណ៍ខាងលើនេះបានបង្កការភ្ញាក់ផ្អើលឡើងកាលពីវេលាម៉ោង១៤ និង៣០នាទី ថ្ងៃទី២១ ខែមីនា ឆ្នាំ២០១៧ នៅចំណុចភូមិកណ្ដាល ឃុំថ្មដា ស្រុកវាលវែង ខេត្តពោធិ៍សាត់។
ប្រភពព័ត៌មានពីនគរបាលប៉ុស្តិ៍រដ្ឋបាលថ្មដាបានឲ្យដឹងថា ជនរងគ្រោះឈ្មោះ រុំ វណ្ណា ភេទប្រុស អាយុ ៥៣ឆ្នាំ សញ្ជាតិខ្មែរ មុខរបរកសិករ បច្ចុប្បន្ន រស់នៅភូមិ-ឃុំកើតហេតុខាងលើ ។
ប្រភពព័ត៌មានខាងលើបន្តថា មូលហេតុ ជនរងគ្រោះបានទៅអារផ្ដួលរលំដើមឈើមួយដើធំ ដើម្បីអារច្រៀកចេញធ្វើគ្រឿងលំនៅឋាន ប៉ុន្តែជាអកុសលក៍ភ្លាត់ស្នៀតនៅពេលដើមឈើដួលរលំនោះ មែកនៃដើមឈើវ័តបោកចំលើចិញ្ចើមខាងស្ដាំ បណ្ដាលឲ្យដួលប្រកាច់ដាច់ខ្យល់ស្លាប់ភ្លាមៗនៅនឹងកន្លែងយ៉ាងអាណោចអាធម័។
ប្រភពដដែលខាងលើបន្តទៀតថា បន្ទាប់ពីអាជ្ញាធរមានសមត្តកិច្ចទទួលបានដំណឹងនេះភ្លាម បានសហការគ្នាចុះទៅពិនិត្យដល់កន្លែងកើតហេតុ លទ្ធផលឃើញថាជនរងគ្រោះពិតជាស្លាប់ដោយមែកឈើវាយចំក្បាលពិតប្រាកដ មិនជាប់ពាក់ព័ន្ធនឹងករណីផ្សេងៗនោះទេ ទើបប្រគល់សាកសពជូនក្រុមគ្រួសារដើម្បីចាត់ចែងតាមប្រពៃណី៕ បឹុម ពិន
