ខេត្តពោធិ៍សាត់៖ កម្លាំងមូលដ្ឋានកងរាជអាវុធហត្ថក្រុងពោធិ៍សាត់ សហការជាមួយកម្លាំងនគរបាលក្រុង,ប៉ុស្តិ៍រដ្ឋបាល ចុះបង្រ្កាបករណីការប្រើប្រាស់និងជួញដូរដោយខុសច្បាបនូវសារធាតុញៀន ជាក់ស្ដែងឃាត់បានជនសង្ស័យ៣នាក់ រួមទាំងវត្ថុតាង និងសម្ភារ ដើម្បីកសាងសំណុំរឿងចាត់ការតាមនីតិវិធីបន្ត។

ប្រតិបត្តិការខាងលើធ្វើឡើងកាលពីវេលាម៉ោង២និង៥០នាទីរសៀលថ្ងៃទី២១ ខែមីនា ឆ្នាំ២០១៧ ត្រង់ចំណុចទួលវែង ស្ថិតក្នុងភូមិព្រៃឪម៉ាល់ សង្កាត់រលាប ក្រុង-ខេត្តពោធិ៍សាត់។

ប្រភពព័ត៌មានពីកម្លាំងមូលដ្ឋានកងរាជអាវុធហត្ថក្រុងពោធិ៍សាត់ដែលបានសហការគ្នាចុះប្រតិបត្តិការខាងលើប្រាប់ថា ក្នុងយុទ្ធនាការប្រយុទ្ធប្រឆាំងបង្រ្កាបជាក់ស្ដែងនេះឃាត់ខ្លួនជនសង្ស័យចំនួន៣នាក់ ទី១ឈ្មោះ ជា ដា ភេទប្រុស អាយុ១៨ឆ្នាំ បច្ចុប្បន្ន រស់នៅភូមិ-សង្កាត់កើតហេតុខាងលើ ទី២ឈ្មោះ រុំ ពន្លក ភេទប្រុស អាយុ ២១ឆ្នាំ បច្ចុប្បន្នរស់ខេត្តបន្ទាយមានជ័យ និងទី៣ ឈ្មោះ ហង្ស សីហា ភេទប្រុស អាយុ២៣ឆ្នាំ បច្ចុប្បន្នរស់នៅភូមិទួលត្បែង ឃុំឈើតុំ ស្រុកក្រគរ ខេត្តពោធិ៍សាត់ ជាម្ចាស់រថយន្តម៉ាក NIZAN RAVARA ពណ៌កណ្តុរប្រមេះ ពាក់ស្លាកលេខ ភ្នំពេញ 2Z-2770។

ប្រភពខាងលើបន្តថា ក្នុងនោះកម្លាំងដកហូតនូវវត្ថុតាងរួមមាន ម្សៅក្រាមពណ៌សថ្លាសង្ស័យជាសារធាតុញៀនចំនួន៦កញ្ចប់តូច ឧបករណ៍សម្រាប់ប្រើប្រាស់គ្រឿងញៀនមួយចំនួន សម្ភារផ្សេងៗ និងរថយន្ត១គ្រឿង។

ប្រភពដដែលខាងលើបន្តទៀតថា បច្ចុប្បន្នជនសង្ស័យរួមទាំងវត្ថុតាង និងសម្ភារផ្សេងៗបានបន្តនីតិវិធីនៅអធិការដ្ឋាននគរបាលក្រុងពោធិ៍សាត់ ដើម្បីកសាងសំណុំរឿងបញ្ជូនបន្តទៅការិយាល័យជំនាញ នៃស្នងការដ្ឋាននគរបាលខេត្តពោធិ៍សាត់ ចាត់ការបន្តតាមនីតិវិធីច្បាប់៕ បឹុម ពិន