ភ្នំពេញ៖ គំនរសំរាមស្ថិតនៅតាមដងផ្លូវបេតុងមួយកន្លែង ត្រូវបានអគ្គិភ័យឆាបឆេះយ៉ាងសន្ធោរសន្ធៅ ហើយក៏មានការព្រួយបារម្ភខ្លាចឆេះដល់ខ្សែភ្លើងធ្លាក់មកទាបនៅពីលើគំនរសំរាមនេះទៀតផង តែសំណាងល្អដែលទីតាំងឆេះ មួយនេះស្ថិតនៅដាច់ឆ្ងាយពីផ្ទះសម្បែងប្រជាពលរដ្ឋ ប៉ុន្តែនៅជិតបឹងដែលមានស្មៅកក់ច្រើន ទើបមានការព្រួយបារម្ភខ្លាចឆេះរាលដល់ស្មៅកក់ទាំងនោះ ហើយអាជ្ញាធរនិងនគរបាលមូលដ្ឋាន បាននាំគ្នាចុះទៅអន្តរាគមន៍យករថយន្តពន្លត់អគ្គិភ័យទៅបាញ់ទឹកពន្ល់ភ្លាមៗផងដែរ។

ហេតុការណ៍នេះបង្កការភ្ញាក់ផ្អើលកាលពីវេលាម៉ោង៨និង៣០នាទីព្រឹកថ្ងៃទី២៣ ខែមីនា ឆ្នាំ២០១៧ នៅតាមបណ្ដោយផ្លូវបេតុង ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានបានឲ្យដឹងថា នៅមុនពេលកើតហេតុគេបានឃើញមានផ្សេងហុយចេញពីគំនរសំរាមនោះ ហើយមិនយូរប៉ុន្មានក៏ស្រាប់តែមានអណ្ដាតភ្លើងឆាបឆេះឡើងយ៉ាងសន្ធោសន្ធៅតែម្ដង ហើយនិងឆេះលឿនថែមទៀតផង ព្រោះសំរាមខាងលើមានចម្រុះគ្នា និងស្ងួតទៀតទើបឆេះលឿនបែបនេះ ហើយនៅពីលើគំនរសំរាមនោះក៏មានខ្សែភ្លើងធ្លាក់មកទាបៗផងដែរ។ ថ្វីដ្បិតតែនៅទីនោះស្ថិតនៅឆ្ងាយពីផ្ទះប្រជាពលរដ្ឋ ប៉ុន្តែមានស្មៅកក់នៅជិតនោះច្រើនទើបធ្វើឲ្យមានការព្រួយបារម្ភខ្លាចឆេះរាលដាលមានបញ្ហាកាន់តែស្មុគ ស្មាញថែមទៀត ខណៈនោះកម្លាំងអាជ្ញាធរនិងនគរបាលប៉ុស្ដិ៍ចោមចៅ បានចេញអន្តរាគមន៍ហៅរថយន្តពន្លត់អគ្គិភ័យចំនួន២គ្រឿងទៅបាញ់ពន្លត់ រហូតរលត់ទៅវិញទាំងស្រុង៕ សុខាសែនជ័យ