ភ្នំពេញ៖ នៅវេលាម៉ោង៣រសៀលថ្ងៃទី៥ ខែមេសា ឆ្នាំ២០១៧ កម្លាំងនគរបាលប៉ុស្តិ៍រដ្ឋបាលទឹកល្អក់ទី៣ នៃអធិការដ្ឋាននគរបាលខណ្ឌទួលគោកបានឃាត់ខ្លួនជនសង្ស័យ២ជាក់ស្តែង ពីបទប្រើប្រាស់ដោយខុសច្បាប់ នូវសារធាតុញៀនប្រព្រឹត្តនៅចំណុចសាលាមជ្ឈមណ្ឌលគរុកោសល្យភូមិភាគរាជធានីភ្នំពេញ ផ្លូវ២៧១ ក្រុមទី២៩ ភូមិ១១ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ ។
សមត្ថកិច្ចឲ្យដឹងថា ជនសង្ស័យទី១. ឈ្មោះ គង់ ប៉ាវចិន ហៅ ប៉ាវ ភេទប្រុស អាយុ១៨ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅ ផ្ទះលេខ៣៨១ ផ្លូវលំ ភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ ទី២.ឈ្មោះ ហ៊ិន ចាន់នី ហៅនី ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់នៅផ្ទះជួល សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
វត្ថុតាងដែលសមត្ថកិច្ចបានចាប់យក (ក្បែរកន្លែងប្រតិបត្តិការ) មានក្រាមពណ៌សថ្លា១កញ្ចប់តូច ( សង្ស័យជាគ្រឿងញៀន ) ថ្នាំគ្រាប់ឈូកពណ៌ផ្កាឈូក១ថង់តូច ថង់សម្រាប់ច្រកគ្រឿងញៀនចំនួន៣ថង់ សម្ភារប្រើប្រាស់គ្រឿងញៀនមួយចំនួននិងឧបករណ៍ផ្សេងៗមួយចំនួន។
បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្តោះអាសន្ននៅអធិការដ្ឋាននគរបាលខណ្ឌទួល គោកដើម្បីសាកសួរ និងកសាងសំណុំរឿងបញ្ជូនទៅ សាលាដំបូងរាជធានីភ្នំពេញ ចាត់ការតាមផ្លូវច្បាប់ ៕ ស តារា
