ភ្នំពេញ៖ មានករណីគ្រោះថ្នាក់ចរាចរណ៍មួយ បង្កឡើងដោយរថយន្ត Audi ស៊េរីទំនើប​មួយគ្រឿងបើកបុកម៉ូតូហុងដា សេ១២៥ ពីក្រោយបណ្តាលឲ្យអ្នកជិះម៉ូតូ៣នាក់រងរបួសធ្ងន់​ត្រូវបានគេដឹកយកទៅសង្រ្គោះនៅមន្ទីរពេទ្យភ្លាមៗ ។

ហេតុការណ៍នេះកើតឡើងកាលពីវេលាម៉ោង១និង ៣០នាទីយប់ ឈានចូលថ្ងៃទី២៤ ខែកញ្ញា ឆ្នាំ២០១៥ នៅតាមបណ្តោយផ្លូវ ២៧១ នៅមុខហាងខារ៉ាអូខេញូវស្តារ ស្ថិតក្នុង​សង្កាត់ទឹកថ្លា ខណ្ឌសែនសុខ ។

ប្រភពព័ត៌មានពីកន្លែងកើតហេតបានឲ្យដឹងថា មុនពេលកើតហេតុ គេឃើញរថយន្ត​ទំនើបមួយគ្រឿងម៉ាក Audi  ពណ៌ខ្មៅនិងពុំមាន ស្លាកលេខសម្គាល់បើកបរដោយ​បុរសមិនស្គាល់ឈ្មោះម្នាក់ ធ្វើដំណើរតាមបណ្តោយផ្លូវលេខ២៧១ ក្នុងទិសដៅពីជើងទៅត្បូង ស្របគ្នាជាមួយម៉ូតូម៉ាកហុងដាC125 ឆ្នាំ២០១១ ពណ៌ខ្មៅ ពាក់ស្លាកលេខ 1BA-5926 ដោយបុរស៣នាក់។ លុះមកដល់កន្លែងកើតហេតុ ស្រាប់តែរថយន្តនេះបានរេចង្កូតទៅ បានបុកម៉ូតូ ពីក្រោយយ៉ាងពេញទំហឹង បណ្តាលឲ្យបុរសដែលជិះម៉ូតូទាំង ៣នាក់នោះរងរបួសធ្ងន់ ដោយខ្លះបាក់ជើង បាក់ឆ្អឹងជំនីរ និងបាក់ភ្លៅហើយ ត្រូវបានដឹកសង្គ្រោះ នៅមន្ទីរកាល់ម៉ែតភ្លាមៗ ។

ប្រភពព័ត៌មានឲ្យដឹងទៀតថា បន្ទាប់ពីកើតហេតុរួចរថយន្តបង្កបើកគេចខ្លួនបាត់ ដោយបានបន្សល់ទុក តែកាងខាងមុខនៅនឹងកន្លែងកើតហេតុ ដែលបាក់បន្តិចតែប៉ុណ្ណោះ។ បន្ទាប់មកទៀតទើបនគរបាលចរាចរ ខណ្ឌសែនសុខ ដឹកម៉ូតូជនរងគ្រោះយកទៅរក្សាទុកដើម្បីរង់ចាំបងប្អូនទទួលយកទៅជួសជុលប្រើប្រាស់ឡើងវិញ ៕

ដោយ៖ ប្រាថ្នា