ខេត្តស្វាយរៀង៖ យ៉ាងហោចណាស់មនុស្សប្រុសស្រី៣នាក់រងរបួសធ្ងន់ស្រាលដោយសារករណីគ្រោះថ្នាក់ចរាចរណ៍រវាងម៉ូតូនិងម៉ូតូបុកគ្នាពេញទំហឹងបណ្ដាលឲ្យដួលរណូករណែលពេញផ្លូវ កាលពីវេលាម៉ោង៦និង៤០នាទីល្ងាចថ្ងៃទី២០ ខែមេសា ឆ្នាំ២០១៧ នៅលើផ្លូវលំ ក្រាលគ្រួសក្រហម ត្រង់ចំណុចភូមិចន្ត្រី ឃុំចន្ត្រី ស្រុករមាសហែក ខេត្តស្វាយរៀង។

យោងតាមសមត្ថកិច្ចនគរបាលស្រុកបានឲ្យដឹងថា ភាគីបង្កហេតុមានឈ្មោះស ភាព ភេទប្រុស អាយុ៤៣ឆ្នាំ មុខរបរធ្វើស្រែ រស់នៅភូមិព្រៃកប្បាស ឃុំចន្ត្រី ស្រុក រមាសហែក ខេត្តស្វាយរៀង បើកម៉ូតូម៉ាកហុងដាឌ្រីម សេ១២៥ ស៊េរីឆ្នាំ២០០០ ពណ៌ក្រហម គ្មានស្លាកលេខ ខូចខាតយ៉ាងដំណំ។

រីឯភាគីរងគ្រោះមានឈ្មោះប្រាក់ សំណាង ភេទស្រី អាយុ៣៨ឆ្នាំ មុខរបរធ្វើស្រែ រស់នៅភូមិចន្ត្រី ឃុំចន្ត្រី ស្រុករមាសហែក ខេត្តស្វាយរៀង និងអ្នករួមដំណើរមានឈ្មោះប្រាក់ ស្រី មុំ អាយុ២៩ឆ្នាំ មុខរបរធ្វើស្រែ ដោយជិះម៉ូតូម៉ាកហុងដាឌ្រីម សេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ ស្វាយរៀង1G-9088។

តាមសាក្សីបានឲ្យដឹងថា មុនកើតហេតុមានបុរសម្នាក់បានជិះម៉ូតូម៉ាកហុងដាឌ្រីម ស៊េរីឆ្នាំ២០០០ ពុំមានភ្លើងបំភ្លឺផ្លូវ ហើយប្រើប្រាស់ល្បឿនលឿនដោយធ្វើដំណើរពីទិសខាងកើតទៅលិចបុកពីក្រោយម៉ូតូ១គ្រឿងទៀតជិះដោយមនុស្សស្រី២នាក់យ៉ាងពេញទំហឹងលាន់សូដូចរន្ទះបណ្ដាលឲ្យភាគីទាំងសងខាងដួលរណូករណែលតែម្ដង។

ក្រោយមកសមត្ថកិច្ចនគរបាលប៉ុស្តិ៍បានមកអន្តរាគមន៍យកភាគីទាំងសងខាងបញ្ជូនទៅព្យាបាលនៅមន្ទីរពេទ្យខេត្តស្វាយរៀង និងធ្វើការវាស់វែងព្រមទាំងអូសម៉ូតូ២គ្រឿង មកកាន់ប៉ុស្តិ៍រដ្ឋបាលចាក់ការបន្តនៅពេលក្រោយ៕ យឹម សុថាន