ភ្នំពេញ៖ ស្ត្រីម្នាក់បានបើករថយន្តម៉ាកកាមរីបាឡែន បត់ឆ្លងផ្លូវមិនប្រយ័ត្នជ្រុលទៅបុករបាំងថ្មពុះចែកទ្រូងផ្លូវ ភ្លាមៗ ក៏ត្រូវរថយន្តម៉ាកព្រូសបើកមកពីក្រោយបុកបន្ថែមទៀតបណ្ដាលឲ្យរងការខូចខាត ។
ហេតុការណ៍ខាងលើ បានកើតឡើងនាវេលាម៉ោ៩និង២០នាទីយប់ ថ្ងៃទី២៦ ខែមេសា ឆ្នាំ២០១៧ នៅតាមបណ្ដោយផ្លូវ២៧១ កែងនិងផ្លូវ៤៨៨ ស្ថិតក្នុងសង្កាត់ផ្សារដើមថ្កូវ ខណ្ឌចំការមន ។
តាមប្រភពព័ត៌មានពីប្រជាពលរដ្ឋដែលនៅក្បែរកន្លែងកើតហេតុ បានប្រាប់ឲ្យដឹងថា នៅមុនពេលកើតហេតុគឺ ស្ត្រីម្នាក់បានបើករថយន្តម៉ាកកាមរីបាឡែន ពណ៌ស ពាក់ស្លាកលេខ ភ្នំពេញ 2X.0041 រួមដំណើរ ដោយស្ត្រី២នាក់ទៀត ក្នុងរថយន្ត និងបានធ្វើដំណើរតាមបណ្ដោយផ្លូវ ៤៨៨ ទិសដៅពីកើតមកលិច ខណៈមកដល់ផ្លូវ២៧១ ក៏បានបត់ស្ដាំ ដោយអ្នកបើកបរខ្វះការប្រុងប្រយ័ត្ន ក៏ជ្រុលចង្កូតទៅបុករបាំងថ្ម ពុះចែកទ្រូងផ្លូវវៀចអស់មួយកង់ ហើយភ្លាមៗ ក៏មានរថយន្តម៉ាកព្រូស ពណ៌ត្រីឆ្លួញ ពាក់ស្លាកលេខ ភ្នំពេញ 2AC-2839 បើកបរដោយបុរសម្នាក់មកពីក្រោយចាប់ហ្វ្រាំងមិនទាន់ ក៏បុកពីក្រោយបន្ថែមទៀតបណ្ដាលឲ្យរងការខូចខាតទាំងពីរគ្រឿង ។
បន្ទាប់ពីកើតហេតុរួច ម្ចាស់រថយន្តទាំងពីរគ្រឿងបានចុះសម្របសម្រួលគ្នា ដោយភាគីខាងរថយន្តកាមរីបាឡែនព្រមទទួលកំហុស និងព្រមសងថ្លៃខូចខាតទៅលើរថយន្តព្រូស ដែលបានបើកបុកពីក្រោយផងដែរ ក៏ប៉ុន្តែពេលដែលកំពុងដោះស្រាយគ្នានោះ សមត្ថកិច្ចមូលដ្ឋានបានចុះមកដល់កន្លែងកើតហេតុ និងបានឃាត់រថយន្តកាមរីបាឡែនឲ្យនៅកន្លែងកើតហេតុ ដើម្បីទាក់ទងទៅជំនាញចរាចរណ៍ក្រុងឲ្យមកស្ទួចយកទៅដោះស្រាយគ្នានៅក្រុង ព្រោះរថយន្តកាមរីបាឡែនបានបង្កផលប៉ះពាល់ដល់សម្បត្តិសាធារណៈ ។
ក្រោយមកសមត្ថកិច្ចជំនាញ់ចរាចរជើងគោករាជធានីភ្នំពេញបានចុះមកវាស់វែងយករថយន្តទាំងពីរគ្រឿងទៅរក្សាទុកនៅក្រុង ខណៈដែលម្ចាស់រថយន្តកាមរីបាឡែនមិនព្រមសងថ្លៃខូចខាត ទៅលើម្ចាស់រថយន្តព្រូសវិញ៕ ភារ៉ា ដង្កោ
