ខេត្តកណ្តាល៖ មានឧប្បត្តិហេតុគ្រោះថ្នាក់ចរាចរណ៍មួយកើតឡើងដោយរថយន្តបុកម៉ូតូបណ្តាលឲ្យបុរស ម្នាក់បាត់បង់ជីវិតយ៉ាងអាណោចអាធ័មកាលពីវេលាម៉ោង ២អធ្រាត្រថ្ងៃទី៣០ខែមេសា ឈានចូលថ្ងៃទី១ខែឧសភា ឆ្នាំ២០១៧នៅចំណុចចន្លោះគីឡូម៉ែត្រ១៩-២០ ត្រង់ទល់មុខផ្សារគគីរ ភូមិគគីរ ឃុំគគីរ ស្រុកកៀនស្វាយ ខេត្តកណ្ដាល ។

ជនរងគ្រោះឈ្មោះឌុច ផានិតភេទប្រុសអាយុ២២ឆ្នាំ(ខ្មែរ)មុខរបរ បុគ្គលិកណាហ្គាវើល មានទីលំនៅភូមិស្ដៅកន្លែង៣ ឃុំដីឥដ្ឋ ស្រុកកៀនស្វាយ ខេត្តកណ្ដាលម្ចាស់ម៉ូតូ ស្លាប់នៅកន្លែងកើតហេតុ។

សមត្ត្ថកិច្ចនគរបាលមូលដ្ឋានបានឲ្យដឹងថា មុនពេលកើតហេតុ  ជនរងគ្រោះបានជិះម៉ូតូមួយគ្រឿងម៉ាកហុងដាគប់ជ្រុងC70ពណ៌ខៀវចាស់ ពាក់ស្លាកលេខភ្នំពេញ1N.8298ចេញពីធ្វើការងារដើម្បីត្រឡប់មកផ្ទះនៅភូមិស្ដៅកន្លែង៣ ឃុំដីឥដ្ឋ ស្រុកកៀនស្វាយ ខេត្តកណ្ដាលដោយធ្វើដំណើរតាមបណ្តោយផ្លូវជាតិលេខ១ ពីលិចទៅកើត ។ លុះជិះទៅដល់ចំណុចកើតហេតុខាងលើក៍ត្រូវរថយន្ដប្រភេទដឹកទំនិញមួយគ្រឿងម៉ាកHINOពណ៌សពាក់ស្លាកភ្នំពេញ3D.9292បើកក្នុងទិសដៅបញ្ច្រាស់គ្នាហើយជ្រុលមក បុកលើម៉ូតូរបស់ជនរងគ្រោះបណ្ដាលឲ្យដួលបោកក្បាលនឹងថ្នល់ស្លាប់ នៅកន្លែងកើតហេតុតែម្តង ។ចំណែក អ្នកបើករថយន្ដមិនស្គាល់អត្តសញ្ញាណបានគេចខ្លួនបាត់ក្រោយកើត ហេតុ។

សមត្ថកិច្ចបន្តថា ក្រោយពេលកើតហេតុ សមត្ថកិច្ចជំនាញបានចុះដល់កន្លែងកើតហេតុវាស់វែងនឹងស្រាវជ្រាវរកអ្នកបើកបរ។ បន្ទាប់មកសមត្ថកិច្ចបានប្រគល់ សពជនរងគ្រោះឲ្យក្រុមគ្រួសារដើម្បីយកទៅធ្វើបុណ្យតាមប្រពៃណី ។ចំណែកមធ្យោបាយយកមករក្សាទុកនៅអធិការដ្ឋាននគរបាលស្រុកកៀនស្វាយ ។  សមត្ថកិច្ចអះអាងថា ករណីនេះបណ្ដាលមកពី រថយន្តបង្កបើកក្នុងល្បឿនលឿន វ៉ារថយន្តក្នុងទិសដៅស្របហើយ ជ្រុលចូលមកបុកម៉ូតូជនរងគ្រោះលើផ្លូវរថយន្តក្នុងទិសដៅច្រាស់ ៕ សណ្តោស