កីឡាករប្រដាល់ Anthony Joshua បាន ឈ្នះខ្សែក្រវាត់ទម្ងន់យក្សពិភពលោក IBF, WBA និង IBO ក្រោយផ្តួលកីឡាករ អ៊ុយក្រែន Wladimir Klitschko ក្នុងទឹកទី ១១កាលពីថ្ងៃសៅរ៍សប្តាហ៍មុន ។

ការប្រកួតនោះធ្វើឡើងនៅក្នុងកីឡដ្ឋាន Wembley ប្រទេសអង់គ្លេសដោយមានអ្នកចូលរួមទស្សនារហូតដល់ទៅ៩ម៉ឺននាក់ដែលនេះគឺជាការប្រកួតប្រដាល់ដ៏ធំបំផុតនៅ អង់គ្លេសមិនធ្លាប់មានក្នុងរយៈពេល៧៨ឆ្នាំចុងក្រោយ ។

កីឡាករវ័យ២៧ឆ្នាំសញ្ជាតិអង់គ្លេស Anthony Joshua ប្រកួត១៩ដងឈ្នះទាំងអស់រួមទាំងជ័យជម្នះលើកីឡាករវ័យ៤១ឆ្នាំ Wladimir Klitschkoនេះផងដែរ។ ចំណែក Klitschko បានរងការបរាជ័យ ជាលើកទី៥ ក្រោយចាញ់ Tyson Furry តាំងពីខែវិច្ឆិកា ឆ្នាំ២០១៥មកម្ល៉េះ ។

ទោះបីជាឈ្នះជើងខ្លាំងក្លាយទៅជាម្ចាស់ខ្សែក្រវាត់ពិភពលោកក៏ដោយក៏ Joshuaនៅតែដាក់ខ្លួនថាគាត់មិនទាន់ល្អឥតខ្ចោះ នៅឡើយទេគឺគាត់កំពុងព្យាយាមរកចំណុចខ្សោយរបស់ខ្លួនហើយអភិវឌ្ឍឲ្យកាន់តែប្រសើរឡើងថែមទៀត ៕