ខេត្តស្វាយរៀង ៖ បុរសជាកម្មករសំណង់ម្នាក់បានរងរបួសធ្ងន់ធ្ងរបាក់ករជើងខាងស្ដាំខណះដែលជិះម៉ូតូទៅបុកនិងរថយន្តដែលបើកបញ្រាស់គ្នាពេញទំហឹងកាលពីយប់ថ្ងៃទី២១ ខែឧសភា ២០១៧ នៅលើផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ ១៦០-១៦១ ស្ថិតក្នុងភូមិតាពៅ សង្កាត់បាវិត ក្រុងបាវិត។

យោងតាមសមត្ថកិច្ចនគរបាលខេត្តស្វាយរៀងបានអោយដឹងថា បុរសដែលបើកបរម៉ូតូមានឈ្មោះ ម៉ិល សាមុត អាយុ៣០ឆ្នាំ  មុខរបរកម្មករសំណង់ មានទីលំនៅភូមិកន្តួតប្រោង ឃុំគោកព្រីង ស្រុកស្វាយជ្រំ ខេត្តស្វាយរៀងខេត្តស្វាយរៀង ខណះជិះម៉ូតូម៉ាក WAVE ពណ៌ខៀវ ស្លាកលេខ កណ្ដាល ១C-៦៤៣០ខូចខាតយ៉ាងដំណំ។ រីឯអ្នកបើករថយន្តជនជាតិចិនមានហ្សូហ៍ ហ្សេជូន (ZHOU ZEJUN) ភេទប្រុស អាយុ២៦ឆ្នាំ ជនជាតិចិន មុខរបរបុគ្គលិករោងចក្រ ទីលំនៅបច្ចុប្បន្ន ផ្ទះ១៩១ ផ្លូវបេតុង ភូមិសន្សំកុសល១ សង្កាត់បឹងទំពុន ខណ្ឌមានជ័យ រាជធានីត្រូវបាននគរបាលឃាត់ខ្លួនភ្លាមៗមកសាកសួរនៅអធិការដ្ឋាននគរបាលក្រុងបាវិត។

សមត្ថកិច្ចនគរបាលបន្តទៀតថាមុនកើតហេតុមាន ម៉ូតូម៉ាក WAVE ពណ៌ខៀវ ផ្លាកលេខ កណ្ដាល 1C-6430 បើកបរដោយបុរសម្នាក់ដោយធ្វើដំណើរពីកើតទៅលិច លុះមកដល់ចំណុចកើតហេតុខាងលើ ក៏ទៅបុករថយន្តម៉ាក TOYOTA HIGHLANDER ពណ៌ទឹកប្រាក់ ផ្លាកលេខ ភ្នំពេញ 2AK-9837 បើកបរដោយជនជាតិចិនទិសដៅពីលិចទៅកើតទិសដៅបញ្រាស់គ្នាពេញទំហឹងបណ្ដាលអោយអ្នកបើកបរម៉ូតូរងរបួសធ្ងន់ (បាក់ជើងស្ដាំ) សន្លប់និងកន្លែង។
ក្រោយមកប្រជាពលរដ្ឋបានរាយការណ៏មកសមត្ថកិច្ចមូលដ្ឋានដោយដឹក អ្នករបួសបញ្ជូនទៅព្យាបាលនៅមន្ទីរពេទ្យបង្អែកខេត្តស្វាយរៀង រីឯវត្ថុតាងទាំង២គ្រឿង ព្រមទាំងអ្នកបើកបររថយន្ត ត្រូវបានឃាត់ខ្លួននៅអធិការដ្ឋាននគរបាលក្រុងបាវិត ដើម្បីបំពេញសំណុំរឿងតាមច្បាប់ ៕