ក្រុងប៉ោយប៉ែត ៖ មន្រ្តីខេត្តបន្ទាយមានជ័យ បានឲ្យដឹងថា នៅយប់ថ្ងៃទី៥ ខែឧសភា ឆ្នាំ២០១៧ ជំនន់ទឹកភ្លៀង បាន និងកំពុងវាយប្រហានៅទីក្រុងប៉ោយប៉ែត ធ្វើឲ្យលិចតំបន់មួយចំនួន រួមមានផ្សារ រង្វង់មូល កំណាត់ផ្លូវជាតិលេខ៥ និងចំណុចដើមពោធិ៍យាយម៉ៅ ហើយធ្ងន់ធ្ងរគឺនៅសង្កាត់ផ្សារកណ្តាល ក្រុងប៉ោយប៉ែត ត្រូវបានទឹកជន់លិចយ៉ាងខ្លាំង។
មន្រ្តីដដែលបន្តថា បន្ទាប់ពីមានជំនន់ទឹកភ្លៀងនេះកើតឡើង អាជ្ញាធរខេត្ត លោក សួន បវរ អភិបាលខេត្តបន្ទាយមានជ័យ លោក ង៉ោ ម៉េងជ្រួន អភិបាលក្រុងប៉ោយប៉ែត លោក អាត់ ខែម ស្នងការនគរបាលខេត្ត និងលោក សៅ សារឿន អធិការរងនគរបាលក្រុងប៉ោយប៉ែត បានដឹកនាំក្រុមការងារ និងកម្លាំងនគរបាលជាច្រើនរូប ចុះពិនិត្យស្ថានភាពទឹកជំនន់នេះភ្លាមៗ។
តាមការបញ្ជាក់ពីសមត្ថកិច្ចថា ការជន់លិចនេះ គឺមកពីមានភ្លៀងធ្លាក់ច្រើនថ្ងៃជាប់ៗគ្នានៅខេត្តបន្ទាយមានជ័យ ហើយនៅយប់ថ្ងៃទី៥ ខែមិថុនាក៏បណ្ដាលឲ្យបាក់ទំនប់អាងស្តុកទឹកអូរខៃដន របស់លោកឧកញ៉ា កុក អាន ដែលទប់ទឹកទុកសម្រាប់លផលិតទឹកស្អាតលក់ឲ្យពលរដ្ឋក្រុងប៉ោយប៉ែតទាំងមូល។
គួរបញ្ជាក់ថា ស្ថិតក្នុងស្ថានភាពទឹកជំនន់នេះ អាជ្ញាធរតាំងពីថ្នាក់មូលដ្ឋានរហូតដល់ថ្នាក់ខេត្ត កំពុងចុះអន្តរាគមន៍ជួយប្រជាពលរដ្ឋ។ ក្នុងករណីរនេះឃើញថា មានផលប៉ះពាល់ខ្លាំងដល់ប្រជាពលរដ្ឋដែលមានប្រឈមគ្រោះថ្នាក់ដល់អាយុជីវិតហើយនោះ អាជ្ញាធរអាចនិងធ្វើការជម្លៀសពលរដ្ឋចេញទៅកាន់ទីទួលសុវត្ថិភាព៕
