ភ្នំពេញ៖ កាលពីព្រឹកថ្ងៃទី៣០ ខែកញ្ញា ឆ្នាំ២០១៥ សាលាដំបូងរាជធានីភ្នំពេញបើកសវនាការជំនុំជម្រះ ប៉ុន្តែក្រោយការសួរដេញដោលលោកចៅក្រម ជួន សុរាសី បានលើកពេលសវនាការ ទៅថ្ងៃទី៧ ខែតុលា ឆ្នាំ២០១៥ បន្តទៀត ។
ជនជាប់ចោទ៤នាក់ នេះមានឈ្មោះ លោកGregg Thomas Fryettអាយុ៤៧ឆ្នាំជនជាតិអង់គ្លេស ជាប្រធានក្រុមប្រឹក្សាភិបាលក្រុមហ៊ុន International Green Energy ឈ្មោះ អ៊ុំ សំអាង អាយុ៥០ឆ្នាំ ជានាយកក្រុមហ៊ុននិងជាអភិបាលក្រុមហ៊ុន International Green Energy ឈ្មោះ សឿម ដែននីអាយុ៤០ឆ្នាំ ជាប្រធានផ្នែកគ្រប់គ្រងគ្រឿងចក្រ និងឈ្មោះ អ៊ុកកែវរតនៈ អាយុ៥៦ឆ្នាំ ជាអតីតនាយករងរដ្ឋបាលសាលាខេត្តបន្ទាយមានជ័យ ។ចំណែកពីរនាក់ទៀត មានម្នាក់ជាមេធាវីឈ្មោះ ទី ពៅ នៅក្រៅឃុំ និងឈ្មោះ ហាញ់ ចំរ៉ុងឧត្តមសេនីទោ និងជាមន្ត្រីយោធាកងអង្គរក្សរត់គេចខ្លួនបាត់¬។
តាមអង្គហេតុជនជាប់ចោទឈ្មោះ អ៊ុក កែវរតនៈ អាយុ ៥៧ឆ្នាំ ពាក់ព័ន្ធក្លែងបន្លំឯកសារសាធារណៈ និងឆបោក ។ ជនជាប់ចោទនិងគូកន ៥-៦នាក់ទៀតនៅចន្លោះឆ្នាំ ២០០៥-២០១០បានឃុបឃិតគ្នាបន្លំធ្វើឯកសារក្លែងក្លាយពាក់ព័ន្ធដីសម្បទានរបស់រដ្ឋចំនួន ៥០៧៩ ហិកតានៅ ស្រុកស្វាយចេក ខេត្តបន្ទាយមានជ័យឲ្យទៅប្រធានក្រុមហ៊ុនជនជាតិ អង់គ្លេសម្នាក់ហើយជនរងគ្រោះបានប្រគល់លុយឲ្យចំនួន ៣ ៩៩៥ ០០០ដុល្លារដើម្បីបានដីកាន់កាប់តែគ្មានសិទ្ធិទទួលដីនោះទើបជនរងគ្រោះប្តឹងតែម្តង។
ជនជាប់ចោទទាំងអស់ ត្រូវបានតុលាការចោទប្រកាន់ពីបទក្លែងបន្លំអក្សរក្នុងឯកសារសាធារណៈ និងប្រើប្រាស់ឯកសារសាធារណៈបទសូកប៉ាន់អ្នកមាននីតិសម្បទាដើម្បីធ្វើលិខិតបញ្ជាក់មិនពិតបទឆបោកមានស្ថានទម្ងន់ ទោសបទក្លែងលិខិតឯកជននិងប្រើប្រាស់លិខិតឯកក្លែង បទកាប់រានព្រៃ ឈូសឆាយដីព្រៃនិងហ៊ុមព័ទ្ធដីព្រៃ ព្រមទាំងបទសមគំនិត និងផ្តើមគំនិត ៕
ដោយ៖ ចាន់ធឿន
