ភ្នំពេញ ៖ ការកកស្ទុះចរាចរណ៍ជារៀងរាល់ថ្ងៃនៅចំណុចរង្វង់មូលចោមចៅផ្តើមចេញដោយសារតែក្រុមរថយន្តធន់ធំបើកបរមិនគោរពច្បាប់ចរាចរណ៍បំពានគំនូសខាងស្តាំមិនយោគយល់អធ្យាស្រ័យទើបងាយនិងការកកស្ទុះចរាចរណ៍បែបនេះ។

ជាក់ស្តែង អ្នកបើកបរ នៅលើកំណាត់ផ្លូវវេងស្រេង នៅព្រឹកថ្ងៃទី២៨ ខែមិថុនានេះ ទោះជាផ្លូវខាងលើ ស្ថាបនា ឡើង បែងចែកទ្រូងផ្លូវ ដោយមានរបាំងខឿន ពុះចែកទ្រូងផ្លូវហើយក៏ដោយ ដើម្បីឲ្យអ្នកបើកបរ ងាយស្រួលបញ្ជាយានជំនិះ មានទៅ មានមក ផ្ទុយទៅវិញ ថ្វីបើមានទ្រូងផ្លូវហើយក៏ដោយ នៅតែឃើញមានយានយន្តប្រភេទធន់ធំ តូច តែងតែធ្វើចរាចរណ៍ លើផ្លូវបញ្ច្រាសទិសដៅទៅវិញ ជាដើមចមធ្វើអោយកំណាត់ផ្លូវត្រូវបានកកស្ទះទ្វេរដង ។

ចំណែកកំណាត់ផ្លូវជាតិលេខ៤វិញ ចាប់ពីចំណុចរង្វង់មូលចោមចៅ រហូតដល់ ខាងលិចភ្លើងស្តុបជម្ពូវ័ន ខណៈដែលមន្ទីរសារធារណការកំពុងកសាងចិញ្ចើមផ្លូវ រៀបចំបណ្តាញលូ បណ្តាញទឹកស្អាត សម្ភារៈ គ្រឿងចក្រមួយចំនួនដាក់​លើចិញ្ចើមផ្លូវ យាមជំនិះឆ្លងកាត់ច្រើន តែនៅមានអ្នកបើកបរមួយចំនួន មិនបានគោរពសិទ្ធគ្នា បើកវ៉ាជែង ដោយសេរី មិនប្រកាន់ផ្លូវរបស់ខ្លួន ៕  សុខាសែនជ័យ