ភ្នំពេញៈ រថយន្ត KIA ដឹកអី​វ៉ានមួយគ្រឿង បើកបរក្នុងល្បឿនលឿន បានរេចង្កូតទៅបុកខឿនសួនច្បារពុះចែកទ្រូងផ្លូវ ហើយរថយន្តនៅមិនទាន់អស់ល្បឿនបានជ្រុលទៅបុកស្លាកប៉ានណូ នៅកណ្តាលសួនច្បារបន្ថែមទៀត បណ្តាលឲ្យបាក់​ ចំណែករថយន្តគល់ជាប់នឹងខឿន​ទៅមុខលេងតែម្តង។

ហេតុការណ៍គ្រោះថ្នាក់ចរាចរនេះ បានកើតឡើងកាលពីម៉ោងជាង២រំលងអធ្រាត្រឈានចូលថ្ងែទី១៨ ខែកក្កដា ឆ្នាំ២០១៧ តាមបណ្តោយផ្លូវជាតិលេខ6 ស្ថិតក្នុងសង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។​

ប្រភពពត៌មាននៅកន្លែងកើតហេតុការណ៍ បានឲ្យ​ដឹងថា មុនពេលកើតហេតុ គេឃើញបុរសម្នាក់ បើករថយន្តកូរ៉េដឹកអីវ៉ាន់មួយគ្រឿង ម៉ាក​KIA ពណ៌ស ពាក់ស្លាកលេខភ្នំពេញ 2AN- 0823 ធ្វើដំណើរតាមបណ្តោយផ្លូវជាតិលេខ6 ក្នុងទិសដៅពីកើតមកលិច យ៉ាងលឿន ខណៈពេលមកដល់កន្លែងកើតហេតុ ទំនងជាអ្នកបើកបររថយន្តងងុយដេក បាន​រេចង្កូតទៅបុកខឿនសួនច្បារពុះចែកទ្រូងផ្លូវ ធ្វើឲ្យ​រថយន្តហោះផ្លោងទៅបុកស្លាកប៉ានណូ ដែលនៅចំកណ្តាល​សួនច្បារពេញទំហឹង បណ្តាលឲ្យដាច់ចេញមកក្រៅ ចំណែករថយន្តគល់ជាប់នឹងខឿនទៅមុខលេងរួច ហើយសំណាងនៅក្នុងហេតុការគ្រោះថ្នាក់ចរាចរនេះគ្មានអ្នករងរបួសនិងស្លាប់ ក្រោយកើតហេតុអ្នកបើកបរបើកទ្វាររត់គេចខ្លួនបាត់ស្រមោល។

ក្រោយពេលកើតហេតុ សមត្ថកិច្ចជំនាញបានចុះមកវាស់វែងយករថយន្តទៅរក្សាទុកនៅការិយាល័យចរាចរផ្លូវគោកនៃស្នងការនគរបាលរាជធានីភ្នំពេញ ដើម្បីរង់ចាំម្ចាស់រថយន្តមកដោះស្រាយតាមនីតវិធី ៕  ជ្រោយពេជ្រ