ភ្នំពេញ ៖ ព្រះរាជអាជ្ញារងអមសាលាដំបូងរាជធានីភ្នំពេញបានសម្រេចចោទប្រកាន់ជនបរទេសដែលបង្រៀន និងជានាយករងនៅសាលាអន្តរជាតិ GOLDEN BRIDGE ពីបទ «ប្រទូស្តកេរ្តិ៍ខ្មាសមានស្ថានទម្ងន់ទោស» ទាក់ទងនឹងជនរងគ្រោះ តាមមាត្រា២៤៦ និងមាត្រា២៤៨នៃក្រមព្រហ្មទណ្ឌ ។
ប្រភពព័ត៌មានពីអ្នកនាំពាក្យអយ្យការអមសាលាដំបូងរាជធានីភ្នំពេញលោក លី សុផាណា បានប្រាប់អោយដឹងនៅរសៀលថ្ងៃទី២៧ ខែកក្កដា ឆ្នាំ២០១៧ថា «លោក សៀង សុខ ព្រះរាជអាជ្ញារង បានបើកការសើបសួរដោយចោទប្រកាន់លើឈ្មោះ Mark Andrew Smith ពីបទ ប្រទូស្តកេរខ្មាសមានស្ថានទម្ងន់ទោស តាមមាត្រា២៤៦ និងមាត្រា២៤៨ នៃក្រមព្រហ្មទណ្ឌ កំណត់ការផ្តន្ទាទោសដាក់ពន្ធនាគារពី ២ឆ្នាំទៅ៥ឆ្នាំ និងពិន័យជាប្រាក់ពី៤លានរៀលទៅ១០លានរៀល ហើយបទល្មើសនេះបញ្ជូនទៅចៅក្រមស៊ើបសួរដើម្បីចាត់ការបន្តតាមនីតិវិធី» ។
សូមបញ្ជាក់ថា បុរសជនជាតិអង់គ្លេសឈ្មោះ Mark Andrew Smith អាយុ៣៩ឆ្នាំ ជានាយករងសាលារៀនអន្តរជាតិ Golden Bridge ដែលត្រូវចាប់ខ្លួនកាលពីល្ងាចថ្ងៃសុក្រទី២១ ខែកក្កដា ឆ្នាំ២០១៧ ពីបទឧក្រិដ្ឋកម្មផ្លូវភេទលើកុមារកម្ពុជា ដែលបាននាំក្មេងស្រីជាសិស្សសាលា អាយុទើប៥ឆ្នាំ ទៅរួមភេទដល់ផ្ទះ ។
ការចុះទៅឃាត់ខ្លួនបុរសជនជាតិបរទេសរូបនេះ បន្ទាប់ពីធ្លាយព័ត៌មាន និងបានបង្ហោះចែកចាយនៅលើបណ្ដាញសង្គម Facebook របស់ស្ដ្រីវ័យចំណាស់ម្នាក់មានគណនីឈ្មោះ «Vriya MC» ដែលបានរៀបរាប់ពីហេតុការណ៍មួយនេះ បន្ទាប់ពីឪពុកម្ដាយក្មេងស្រីរងគ្រោះបានប្រាប់ទៅស្ដ្រីរូបនេះ ប៉ុន្ដែពួកគេមិនហ៊ានដាក់ពាក្យបណ្ដឹងទៅសមត្ថកិច្ច គ្រាន់តែបានទៅជួបជាមួយនាយកសាលាដែលជាជនជាតិខ្មែរ ៕ ហេង សូរិយា
