ខេត្តកំពង់ឆ្នាំង ៖ នៅថ្ងៃទី២៣ សីហា ឆ្នាំ២០១៧នេះ សមត្ថកិច្ចបាននាំទៅពិនិត្យកន្លែងកើតហេតុ ស្ថិតត្រង់ចំណុចក្រោល គោ ក្នុងភូមិទំនប់ ឃុំត្រងិល ស្រុកកំពង់លែង ដែលជាកន្លែងដែលវាយប្រពន្ធស្លាប់កាលពីជាង១ខែមុន ។ ជនសង្ស័យខាងលើមានឈ្មោះជុច អេត អាយុ៤៥ឆ្នាំ ។ ចំណែកឯស្ត្រីប្រពន្ធដែលស្លាប់ឈ្មោះអែល គីមស៊ីម អាយុ៤៣ឆ្នាំ ។
សមត្ថកិច្ចបានដឹងថា គឺគ្រួសារនេះមានភាពរកាំរកូសគ្នាជាយូរមកហើយ កាលពីថ្ងៃទី២៩ មិថុនា ២០១៧ កន្លងមក ទាំងពីរនាក់ប្តី-ប្រពន្ធជិះម៉ូតូមកចំណុចកើត ដើម្បីវាស់ដីហើយបានទាស់សម្តីគ្នា ពេលនោះប្តីបានច្រានប្រពន្ធដួលទៅលើខ្នោះអណ្តូងលូបែកឈាមតាមមាត់ បន្ទាប់មក ប្តីបានលើកប្រពន្ធទម្លាក់ចូលអណ្តូងតែម្តង ។ ក្រោយពីទម្លាក់ប្រពន្ធចូលអណ្តូងហើយ បុរសជាប្តីបានវាយខ្នោះអណ្តូងសង្គ្រប់បន្ថែមទៀត ទើបមកផ្ទះវិញ ។
នៅថ្ងៃទី០៣ កក្កដា ២០១៧ បុរសជាប្តីបានទៅប្តឹងមេឃុំថា ប្រពន្ធគាត់រត់ទៅបាត់ហើយសង្ស័យថា រត់តាមប្រុស ។ ប៉ុន្តែឈាមស្រែកស្បែកហៅ បុរសជាប្តីបានទៅស្រឡាញ់ស្រីក្នុងភូមិម្នាក់ តែនារីនោះបដិសេធថា មានប្រពន្ធហើយឱ្យខ្ញុំធ្វើម៉េច ។ ក្រោយពីលួងលោមស្រឡាញ់នារីនោះមិនបាន បុរសរូបនេះក៏បានសារភាពត្រង់ថា រូបគេបានសម្លាប់ប្រពន្ធចោលហើយ ទើបបែកការណ៍ដឹងដល់សមត្ថកិច្ចនគរបាលចុះចាប់ឃាត់ខ្លួនមកសាកសួរ រហូតជនសង្ស័យនេះព្រមសារភាព ៕ ហេង នរិន្ទួ្រ
