ភ្នំពេញ៖ មានការភ្ញាក់ផ្អើលមួយកើតឡើង នៅលើកំណាត់ផ្លូវសហព័ន្ធរុស្សី មុខច្រកចូលមន្ទីរពេទ្យបង្អែកពោធិ៍ចិនតុង ភូមិតាងួន សង្កាត់កាកាប ខណ្ឌពោធិ៍សែនជ័យ ។

កាលពីវេលាម៉ោង២រសៀល ថ្ងៃទី០៩ ខែតុលា ឆ្នាំ២០១៥ នេះ ដំបូងឡើយពលរដ្ឋ ធ្វើដំណើរតាមផ្លូវ នឹកថា កើតមានគ្រោះថ្នាក់ចរាចរណ៍ហើយ ទើបធ្វើឱ្យកំណាត់ផ្លូវខាងលើកកស្ទះ លុះឃើញជាក់ស្តែងទើបដឹងថា ស្រ្តីម្នាក់បានវាយឡើងជាន់ ធាក់ កញ្ចក់រថយន្ត បុរសម្នាក់ កំពុងបើកបរ បណ្តើរស្រីក្មេង បណ្តាលឱ្យបែកខ្ទេច បង្កឱ្យភ្ញាក់ផ្អើលយ៉ាងនេះ សង្ស័យថា ភ្លើងប្រច័ណ្ឌ ខឹងប្តីមានស្រីថ្មី មិនជូនខ្លួនទៅវត្តនាខែភ្ជុំបិណ្ឌ ។

រថយន្តខាងលើម៉ាកឡិចសុីស៤៧០ ពណ៌ស្ករ ពាក់ស្លាកលេខ ខេមរភូមិន្ទ ០៩ ២-៩០០៥ បើកបរដោយ បុរសម្នាក់ មិនស្គាល់ឈ្មោះ រួមដំណើរជាមួយនារីវ័យក្មេងម្នាក់ តែក្រោយកើតហេតុ នារីវ័យក្មេងរូបស្រោះបានចុះគេចខ្លួនបាត់ ។ ចំណែក ខាងម៉ូតូ ម៉ាកស្កុបពី ពណ៌ក្រហម ពាក់ស្លាកលេខ ភ្នំពេញ 1FH-1995 បើកបរដោយស្រ្តីម្នាក់ ដែលអះអាងថាខ្លួនជាប្រពន្ធរបស់បុរសបើកបររថយន្ត រួមដំណើរជាមួយកូនតូចៗ៣នាក់ ស្រី២នាក់និងប្រុសម្នាក់ ។

តាមប្រភពពីអ្នកឃើញហេតុការណ៍បានឱ្យដឹងថា មុនកើតហេតុ គេឃើញរថយន្តខាងលើ បើកពីលិចទៅកើត លុះដល់ចំណុចខាងលើ ស្រាប់តែមានម៉ូតូ ស្កុបពី បើកបរដោយស្រ្តីកូន៣ វ៉ាជែងរថយន្ត ហើយកាក់ឃាំងពីមុខរថយន្ត ចុះមកវាយ ឡើងជាន់ ធាក់កញ្ចក់រថយន្ត បណ្តាលឱ្យបែកខ្ទេច ហើយស្រែកឡូរឡាផ្អើលពេញដងផ្លូវ បង្កឱ្យមានការភ្ញាក់ផ្អើល និងកកស្ទះចរាចរណ៍ ។ ក្នុងទិដ្ឋភាព រឿងរ៉ាវខាងលើ ទើបដឹងថា ប្រពន្ធខឹងប្តីនាំស្រីក្មេង មិននាំខ្លួនទៅវត្ត រហូតដល់ប្រពន្ធតាមទាន់កើតមានរឿងបែបនេះ ។ ក្នុងសភាព រញ៉េរញ៉ៃលើកំណាត់ផ្លូវ ខណៈនោះគេឃើញ មានស្រីក្មេង ម្នាក់បើកទ្វាររថយន្តចុះរត់គេចខ្លួនបាត់ ។

តាមរយៈស្រ្តីជាប្រពន្ធ ដែលស្រែកឡូរឡា នៅកន្លែងកើតហេតុ ធ្វើឱ្យអ្នកដំណើរតាមផ្លូវ សង្ស័យថា រឿងស្នេហាត្រីកោណ អាចកុហកប្រពន្ធ ថាជាប់រវល់នេះ រវល់នោះ ហើយលួចទៅដឹកស្រីក្មេងដើរលេងទៅវិញ ទោះជាស្រ្តីជាប្រពន្ធ ស្នើរសុំឱ្យឌុបជូនទៅវត្តនារដូវកាលភ្ជុំកាន់បិណ្ឌ ក៏ប្តីជាប់រវល់ រហូតដល់តាមទាន់ ជាន់បែកកញ្ចក់រថយន្តខ្ទេច ។

ភ្លាមៗ ដើម្បីកុំឱ្យកើតមានការកកស្ទះចរាចរណ៍ ខណៈដែលពលរដ្ឋធ្វើដំណើរឆ្លងកាត់ ដេរដាស់កុះករ និងកកស្ទះ ត្រូវបានសមត្ថកិច្ច នាំអ្នកទាំង២ ទៅធ្វើការសាកសួរ និងសម្របសម្រួល កុំឱ្យកើតហិង្សា រវាងប្តី-ប្រពន្ធ នាខែបិណ្ឌភ្ជុំ ប្រពៃណីដូនតាខ្មែរយើង ៕

ដោយ៖ សុខា សែនជ័យ