ខេត្តសៀមរាប ៖ កម្លាំងនគរបាលនៃអធិការដ្ឋានស្រុកក្រឡាញ់ ដឹកនាំដោយលោកវរសេនីយ៍ទោ ជី បេង ជន អធិការនគរបាលស្រុក បានចុះបង្រ្កាបចាប់យកឧបករណ៍ ល្មើសច្បាប់មួយចំនួន និងឃាត់ខ្លួនក្រុមឆក់ត្រី១៥នាក់អោយធ្វើកិច្ចសន្យាបញ្ឈប់ ។
យុទ្ធនាការបង្ក្រាបធ្វើឡើងនៅថ្ងៃទី២៦ ខែកញ្ញា ឆ្នាំ២០១៧ ស្ថិតនៅភូមិចំនួន២ ក្នុង ឃុំសែនសុខ ស្រុកក្រឡាញ់ ខេត្ត សៀមរាប ។
លោកវរសេនីយ៍ទោ ជី បេង ជន អធិការនគរបាលស្រុក បានប្រាប់ថា មុនឈានដល់ធ្វើការនាំខ្លួនក្រុមនេសាទខុសច្បាប់ ចំនួន១៥នាក់នោះ នៅក្នុងភូមិចំនួន២ ដោយមានការចូលរួមពីសំណាក់បងប្អូនអ្នកនេសាទមួយចំនួន ដោយពួកគាត់បានយល់ពីច្បាប់ ទើបលោកបានដឹកនាំកម្លាំងរបស់អធិការស្រុកក្រឡាញ់ ចុះបង្ក្រាបករណីបទល្មើសនេសាទខុសច្បាប់ ព្រមទាំងដកហូតបានវត្ថុតាងមួយចំនួន ដើម្បីឱ្យពួកគាត់ធ្វើកិច្ចសន្យាបញ្ឈប់សកម្មភាព ប្រើឧបករណ៍ឆក់ត្រី តទៅទៀត ក្នុងនោះយើងបានដកហូត ពីអ្នកនេសាទ នៅភូមិចំនួន ០២ ក្នុងឃុំសែនសុខ នោះរួមមាន៖ ទី១/ ភូមិ ទ្រាស ចំនួន ១១ គ្រឿង អាគុយ ចំនួន ១០ និង ទី២/ ភូមិ ព្រៃថ្កូវ ចំនួន ០១គ្រឿង សរុប ១២គ្រឿង អាគុយ សរុប១០ ។
បច្ចុប្បន្ន កម្លាំងយើងបានធ្វើអប់រំណែនាំនិងធ្វើកិច្ចសន្យាឱ្យឈប់ប្រព្រឹត្តិបទល្មើសនេសាទខុសច្បាប់នេះតទៅទៀតនិងឱ្យវិលត្រឡប់ទៅផ្ទះវិញ ចំពោះឧបករណ៍នេសាទខុសច្បាប់ (អាំងម៉ូទ័រ) និង អាគុយត្រូវបានយកមករក្សាទុកនៅអធិការដ្ឋាននគរបាលស្រុកក្រឡាញ់៕
