ខេត្តកណ្តាល ៖ បុរសម្នាក់ដែលគេដឹងថា មានមុខរបររកនិងឆក់ត្រី ត្រូវបានគេប្រទះឃើញដេកស្លាប់ជាមួយនឹងឧបករណ៍ឆក់ត្រី កាលពីវេលាម៉ោង៥និង៣០នាទី ថ្ងៃទី២៣ ខែវិច្ឆិកា ឆ្នាំ២០១៧ នៅចំណុចប្រឡាយអុងកូ ស្ថិតក្នុងភូមិព្រែកត្រែង ឃុំសិត្បូ ស្រុកស្អាង ខេត្តកណ្តាល ។
សពជនរងគ្រោះឈ្មោះ សឿន ជីងឡុង ភេទប្រុស អាយុ២៨ឆ្នាំ ជនជាតិខ្មែរ មុខរបររកត្រី មានទីលំនៅភូមិ-ឃុំកើតហេតុខាងលើ ។
ក្រុមគ្រួសារជនរងគ្រោះបានឲ្យដឹងថា ជាធម្មតា ជនរងគ្រោះតែងប្រកបរបរជាមួយនឹងការឆក់ត្រីជាប្រចាំ នៅតាមដងអូរ ប្រឡាយនានា ។ លុះនៅថ្ងៃកើតហេតុឪពុកម្តាយនិងបងប្អូនមិនឃើញត្រឡប់មកផ្ទះវិញ មានការសង្ស័យ ក៏ចែកទិសដៅគ្នាដើររក ស្រាប់តែប្រទះឃើញឈ្មោះ សឿន ជីងឡុង ដេកស្លាប់ដោយភ្ជាប់ជាមួយនៅឧបករណ៍ឆក់ត្រីនៅចំណុចប្រឡាយអុងកូ រួចក៏បានរាយការណ៍ជូនអាជ្ញាធរមូលដ្ឋាន សមត្ថកិច្ចដឹងឮ ។
កម្លាំងសមត្ថកិច្ចប៉ុស្តិ៍សិត្បូ សហការជាមួយកំលាំងជំនាញក្រុមប្រឹក្សាឃុំ មេភូមិ បានចុះពិនិត្យលើសពឃើញថា មានស្លាកស្នាមជាំស្លោក នៅចំណុចត្រង់បបូរមាត់ ក្រៅពីនេះពុំមានស្លាកស្នាមអ្វីគួរឲ្យកត់សម្គាល់ឡើយ។
ក្រោយពិនិត្យរួចសពបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី ៕ ស្អាងជ័យ