ខេត្តឧត្តរមានជ័យ ៖ មេឈ្មួញឈើដ៏ ល្បីនៅភូមិត្រាំប៉ោង ឃុំព្រះប្រឡាយ ស្រុក ត្រពាំងប្រាសាទ ខេត្តឧត្តរមានជ័យម្នាក់ ឈ្មោះចែ មុំ កំពុងល្បីថា បាននិងកំពុង បំផ្លាញព្រៃឈើនៅក្នុងតំបន់សហគមន៍ និងព្រៃឈើនៅក្នុងដែនជម្រកសត្វព្រៃគូលែន ព្រហ្មទេព ព្រមទាំងបំផ្លិចបំផ្លាញេផ្លូវលំមួយខ្សែប្រវែងរាប់គីឡូម៉ែត្រតាមរយៈការដឹក ជញ្ជួនបទល្មើសឈើ នៅក្នុងឃុំយាង ស្រុក ជាំក្សាន្ដ ខេត្តព្រះវិហារ យកមកលាក់ទុកនៅភូមិត្រាំប៉ោងស្រុកត្រពាំងប្រាសាទ។
ប្រភពបានឲ្យដឹងថា ចែមុំ បានធ្វើ សកម្មភាពបំផ្លាញព្រៃឈើ និងបំផ្លាញផ្លូវ ថ្នល់ខ្ទេចស្ទើរទាំងស្រុងនេះ ដោយសារតែ ចែមុំ បានប្រើប្រាស់លុយទិញទឹកចិត្តអាជ្ញាធរ និងស្ថាប័នពាក់ព័ន្ធអស់ទៅហើយ គឺចែ មុំ ចំណាយប្រាក់រាប់ម៉ឺនដុល្លារក្នុងការផ្ដល់ទុនដល់ពលរដ្ឋសម្រាប់កាត់អារ ឈើយកមកលក់ឲ្យខ្លួន ។
សមត្ថកិច្ចបានឲ្យដឹងនៅថ្ងៃទី២៤ ខែវិច្ឆិកា ឆ្នាំ២០១៧ថា ឈ្មោះសៀវ និង ឈ្មោះ ឆាត ដែលត្រូវជាកូនអនុប្រធានភូមិកំប្រាក់ផងនោះ គឺជាអ្នកប្រមូលទិញ និងបំផុសដល់ពលរដ្ឋឲ្យចូលទៅកាត់អារឈើនៅក្នុងតំបន់សហគមន៍ និងដែនជម្រកសត្វព្រៃគូលែនព្រហ្មទេពយកមកលក់ឲ្យខ្លួនសម្រាប់លក់បន្តឲ្យទៅថៅកែធំឈ្មោះចែមុំ ។
គួរបញ្ជាក់ផងដែរថា សកម្មភាពទាំងនេះ បានកើតមានជាហូរហែរៀងរាល់ថ្ងៃជាច្រើនឆ្នាំមកហើយ ដែលចែមុំ បានធ្វើសកម្មភាពដឹកជញ្ជូនឈើចេញពីតំបន់សហគមន៍ និងព្រៃឈើនៅក្នុងដែនជម្រកសត្វព្រៃគូលែនព្រហ្មទេព ក្នុងឃុំយាង ស្រុកជាំក្សាន្ដ ខេត្តព្រះវិហារចូលមក ស្រុកត្រពាំងប្រាសាទ ដែលពុំមានសមត្ថកិច្ច ក៏ ដូចជាសមត្ថកិច្ចជំនាញណាម្នាក់យកចិត្ត ទុកដាក់សោះឡើយ គឺមានតែចូលដៃចូលជើងត្រូវរ៉ូវគ្នាតែប៉ុណ្ណោះ៕
ប៉ែន នួន
