ខេត្តកំពុងចាម ៖ ករណីគ្រោះថ្នាក់ចរាចរណ៍មួយបានកើតឡើង នៅលើផ្លូវជាតិលេខ៦ ចន្លោះគីឡូម៉ែត្រលេខ៨១-៨២ រវាងម៉ូតូបុកជាមួយម៉ូតូ កាលពីថ្ងៃអាទិត្យ ១៤រោច ខែ មិគសិរ ឆ្នាំរកាព.ស២៥៦១ ត្រូវនឹងថ្ងៃទី១៧ ខែធ្នូ ឆ្នាំ២០១៧ វេលាម៉ោង១១ព្រឹក ស្ថិតក្នុង ភូមិសង្កែរឃុំស្តើងជ័យ ស្រុកជើងព្រៃ ខេត្តកំពុងចាម ។
នគរបាលចរាចរណ៍ស្រុកជើងព្រៃបានឲ្យដឹងថា ភាគីទី១-ឈ្មោះ សៀន វ៉ា ភេទប្រុស អាយុ៣៤ឆ្នាំ រស់នៅភូមិត្រពាំងគរ ឃុំត្រពាំងគរ ស្រុកជើងព្រៃខេត្តកំពង់ចាម បើកបរម៉ូតូម៉ាក សេ១២៥ ពាក់ស្លាកលេខកំពង់ចាម1E-2573 ក្នុងដំណើរស្របទិសគ្នា ពីត្បូងទៅជើង ។ ចំណែកភាគីម្ខាងទៀតឈ្មោះ វង់ ចយ ភេទប្រុស អាយុ២៤ឆ្នាំ មានទីលំនៅភូមិ មេសរ ឃុំព្រែកកុយ ស្រុកកងមាស ខេត្តកំពង់ចាម បើកម៉ូតូម៉ាក suzuki nexពាក់ស្លាកលេខ ភ្នំពេញ1GH.1285 ។ លុះធ្វើដំណើរមកដល់ចំណុចកើតហេតុ ស្រាប់តែភាគីបើកម៉ូតូsuzuki nex បើកកៀរភាគីបើកម៉ូតូសេ១២៥ បណ្តាលឲ្យដួលរងរបួសធ្ងន់មនុស្សប្រុសស្រី២នាក់ ។
នគរបាលជំនាញចរាចរណ៍បានឲ្យដឹងថា ក្រោយការវាស់វែង និងពិនិត្យឃើញថា ភាគីបើក ម៉ូតូsuzuki nex បើកបរជែងខ្វះការប្រុងប្រយ័ត្ន ទើបទៅកៀរភាគីបើកម៉ូតូសេ១២៥បង្កឲ្យ មានគ្រោះថ្នាក់យ៉ាងដូច្នេះ ។
ដោយឡែកវត្ថុតាងម៉ូតូទាំង២គ្រឿង ត្រូវបានសមត្ថកិច្ចយកមករក្សាទុកនៅអធិការដ្ឋាននគរបាលស្រុកជើងព្រៃ ៕ វណ្ណៈ
