ភ្នំពេញ៖​ តាមគម្រោង​ នៅវេលាម៉ោង៩៖០០ព្រឹកថ្ងៃទី២១ ខែធ្នូ ឆ្នាំ២០១៧​លោក គី ឫទ្ធី ចៅក្រមស៊ើបសួរសាលាដំបូងរាជធានីភ្នំពេញ នឹងបន្តសួរចម្លើយលោក កឹម សុខា អតីតប្រធានគណបក្សសង្គ្រោះជាតិ នៅក្នុងពន្ធនាគារត្រពាំងផ្លុង ខេត្តត្បូងឃ្មុំ​ បន្តទៀតពាក់ព័ន្ធនឹងបទល្មើសក្បត់ជាតិ។

មមន្ត្រីតុលាករ​ ថ្លែងថា ការសួរចម្លើយនេះ នឹងធ្វើឡើង​រយៈពេលពីរថ្ងៃជាប់ៗគ្នាពោលគឺនៅថ្ងៃទី២១ និង២២ខែធ្នូ ឆ្នាំ២០១៧ បន្ទាប់ពីការសួរចម្លើយ កាលពីថ្ងៃទី១៤ខែធ្នូ ឆ្នាំ២០១៧ មិនទាន់បញ្ចប់។

គួរបញ្ជាក់ថា លោក កឹមសុខា ត្រូវបានសមត្ថកិច្ចចាប់ខ្លួន នៅយប់ថ្ងៃទី៣ ខែកញ្ញាឆ្នាំ២០១៧ បន្ទាប់ពីមានការបែកធ្លាយវីដេអូមួយបង្ហាញថា លោកបានសារភាពអំពីការអនុវត្តតាមការបង្គាប់បញ្ជារបស់សហរដ្ឋអាមេរិក ក្នុងគោលបំណងផ្តួលរំលំរាជរដ្ឋាភិបាលកម្ពុជាជាយូរណាស់មកហើយ។

លោក កឹម សុខា ត្រូវបានតុលាការឃុំខ្លួន ដាក់ពន្ធនាគារបណ្តោះអាសន្ន កាលពីថ្ងៃទី០៦ ខែកញ្ញា ឆ្នាំ២០១៧ដោយចោទប្រកាន់ពីបទល្មើស “ក្បត់ជាតិ”​ដែលអាចប្រឈមមុខនឹង ការជាប់ពន្ធនាគារពី១៥ឆ្នាំ ទៅ៣០ឆ្នាំ។

អយ្យការអមសាលាដំបូងរាជធានីភ្នំពេញ បានបង្ហាញថា លោក កឹម សុខាជាប់ចោទប្រកាន់ពីបទ«សន្និដ្ឋិភាពជាមួយបរទេស »តាមមាត្រា៤៤៣ នៃក្រមព្រហ្មទណ្ឌ។

ទោះបីជាមានបណ្តឹងជំទាស់និងបណ្តឹងសុំនៅក្រៅឃុំជាបន្តបន្ទាប់ក្តី ប៉ុន្តែនាថ្មីៗនេះទាំងសាលាឧទ្ធរណ៍ និងតុលាការកំពូល បានសម្រេចទាត់ចោលបណ្តឹងរបស់ ក្រុមមេធាវីការពារក្ដី លោក កឹមសុខា ដែលប្តឹងប្រឆាំងនឹងដីកាសម្រេចឃុំខ្លួន លោកកឹម សុខា ដោយស្ថាប័នតុលាការ អះអាងថា ការសម្រេចឃុំខ្លួន លោក កឹមសុខា ជារឿងត្រឹមត្រូវតាមផ្លូវច្បាប់៕ចេស្តា