លោក ជុង មិញទួន រដ្ឋមន្ត្រីក្រសួងគមនាគមន៍ និងព័ត៌មានវៀតណាម បានមានប្រសាសន៍ក្នុងកិច្ចប្រជុំមួយ កាលពីថ្ងៃសុក្រថា ក្រុមហ៊ុនបណ្តាញទំនាក់ទំនងសង្គមហ្វេសប៊ុក បានលុបចោលគណនី ដែលផ្សាយបរិហារកេរ្តិ៍ ឬរិះគន់ថ្នាក់ដឹកនាំវៀតណាម ហើយសារទាំងនោះមានខ្លឹមសារឃោសនាប្រឆាំងរដ្ឋាភិបាល និងគណបក្សកុម្មុយនីស្ត វៀតណាម។

លោក ជុង មិញទួន បានបញ្ជាក់ថា ក្នុងចំណោមគណនី ត្រូវបានលុបចោលទាំងនេះ មានចំនួន១០៧ជាគណនីក្លែងក្លាយ ហ្វេសប៊ុកផេកចំនួន៣៩៤ មានផ្សាយផលិតផល និងសេវាខុសច្បាប់។

លោកបានអះអាងថា រដ្ឋាភិបាលវៀតណាម បានចាត់វិធានការមុនគេក្នុងការទប់ទល់នឹងក្រុមហ៊ុនអ៊ីនធឺណិតធំជាងគេបំផុតនៅលើពិភពលោក គឺក្រុមហ៊ុន google និងក្រុមហ៊ុន Facebook។

លោកបានមានប្រសាសន៍ដូច្នេះថា «ការរំលោភបំពាននៅលើបណ្តាញទំនាក់ទំនងសង្គមបានក្លាយជាក្បិចកលពឹសពុល និងកាន់តែពិបាកទទួលយកបាន។ កម្លាំងបច្ចាមិត្តអាចឆ្លៀតឱកាសយកការរីចម្រើនផ្នែកបច្ចេកវិទ្យាដើម្បីចែកចាយខ្លឹមសារទុច្ចរិត និងបំពុលកាន់តែច្រើនឡើងនៅលើសេវាផ្សព្វផ្សាយរបស់បរទេស»។

លោករដ្ឋមន្ត្រីបានមានប្រសាសន៍ទៀតថា ក្រុមហ៊ុន google ក៏បានលុបឃ្លីបវីដេអូបែបបំពុលប្រហែល៤៥០០ ដែលត្រូវបានបង្ហោះនៅលើ You Tube ក្នុងចំណោមឃ្លីបវីដេអូចំនួន៥០០០ ដែលរដ្ឋាភិបាលវៀតណាមបានសុំឲ្យលុបចោល។

លោក ជុង មិញទួន បានអះអាងទៀតថា «វៀតណាម គឺជាប្រទេសមួយក្នុងចំណោមបណ្តាប្រទេសជាច្រើនទៀត ដែលទទួលបានការឆ្លើយតបជាទីគាប់ចិត្តពីក្រុមហ៊ុន google»៕