ភ្នំពេញ ៖ អនុរក្សពន្ធនាគារព្រៃស នៅថ្ងៃទី២៧ ខែធ្នូ នាំខ្លួនបុរសម្នាក់ដែលបើករថយន្តបុករះបណ្តាលឱ្យមនុស្សបីនាក់ស្លាប់និងរបួសធ្ងន់ស្រាល៨នាក់ តាមបណ្តោយមហាវិថីព្រះមុនីវង្ស មកកាត់ទោស ។ ប៉ុន្តែ ក្រោយការសួរដេញដោល លោកចៅក្រម នូ វាសនា លើកពេលប្រកាសសាលក្រមទៅថ្ងៃទី០១ ខែកុម្ភះ ឆ្នាំ២០១៧ ខាងមុខនេះវិញ ។
ជនជាប់ចោទឈ្មោះ មាស សុខហេង អាយុ៣០ឆ្នាំ មុខរបរលក់ទូរស័ព្ទ ត្រូវបានតំណាងអយ្យការចោទប្រកាន់ពីបទ”បើកបរធ្វេសប្រហែស ខ្ជីខ្ជា មិនប្រុងប្រយ័ត្ន ឬ មិនគោរពកាតព្វកិច្ច បណ្តាលឱ្យស្លាប់និងរបួសអ្នកដទៃ តាមមាត្រា៨៣និងមាត្រា៨៥ច្បាប់ស្តីពីចរាចរណ៍ផ្លូវគោក។
គួររំលឹកថា កាលពីល្ងាចថ្ងៃទី២៧ ខែមីនាឆ្នាំ២០១៧នៅចំណុចមុខរោងចក្រគង់ហុង មហាវិថីមុនីវង្ស កែងផ្លូវលេខ៥០៨ស្ថិតក្នុងសង្កាត់ទន្លេបាសាក់ខណ្ឌចំការមនមានគ្រោះថ្នាក់ចរាចរបង្កឡើងដោយសាររថយន្តម៉ាក TOYOTA CAMRY ពណ៌ទឹកមាសពាក់ផ្លាកលេខភ្នំពេញ 2M-2245 បានធ្វើដំណើរបញ្ច្រាស់ទិសចរាចរណ៍ ។
លុះមកដល់ចំណុចកើតហេតុ បានបុករះម៉ូតូចំនួន០៧គ្រឿង កំពុងធ្វើដំណើរច្រាសទិសគ្នា បណ្តាលឱ្យមនុស្សស្លាប់បីនាក់ រងរបួសធ្ងន់៥នាក់ រងរបួសស្រាល៣នាក់ រថយន្តខូចខាតធ្ងន់ ម៉ូតូខូចខាតធ្ងន់០៦គ្រឿង និងខូចខាតស្រាលមួយគ្រឿង ៕ ចេស្តា
...
