ភ្នំពេញ៖ ដើម្បីរក្សាសុវត្ថិភាពផ្ទាល់ខ្លួន ក្នុងការបង្ក្រាបបទល្មើស នៅវេលាម៉ោង៩ព្រឹកថ្ងៃព្រហស្បតិ៍ ២កើត ខែមាឃ ឆ្នាំរកា នព្វស័ក ព.ស ២៥៦១ ត្រូវនិងថ្ងៃព្រហស្បតិ៍ ទី ១៨ ខែ មករា ឆ្នាំ ២០១៨ លោក ឌី រ័ត្នខេមរុណ អភិបាលរង ខណ្ឌមានជ័យ បានចូលរួមពិធី សំណេះសំណាល និង បំពាក់មួកសុវត្ថិភាព ចំនួន ១៦មួក ជូន ប៉ុស្តិ៍នគរបាលរដ្ឋបាលស្ទឹងមានជ័យ ទី ១ ខណ្ឌមានជ័យ រាជធានីភ្នំពេញ ។
លោក ឌី រ័ត្នខេមរុណ អភិបាលរងខណ្ឌ និងក្នុងនាមគណៈបញ្ជាការឯកភាពខណ្ឌមានជ័យ បានបញ្ជាក់ថា ក្នុងការផ្តល់មួកសុវត្ថិភាព ជូនកងកំលាំងអន្តរាគមន៍ នាព្រឹកនេះគឺជាលើកទី ៣ ហើយដែលបានផ្តល់មួយជូនកងកំលាំងដូចជា :
លើកទី ១ បានផ្តល់មួក ចំនួន ២០មួក ជូនកងកំលាំងអធិការដ្ឋានខណ្ឌមានជ័យ ចំនួន ២០មួក ;លើកទី ២ បានផ្តល់មួកចំនួន ១៦មួក ក្មងដៃ ក្មងជើងចំនួន ០៥គូ ជូនប៉ុស្តិ៍នគរបាលរដ្ឋបាលស្ទឹងមានជ័យទី៣ ;និងលើកទី ៣ ផ្តល់មួកជូនប៉ុស្តិ៍រដ្ឋបាលនគរបាលស្ទឹងមានជ័យទី១ ចំនួន១៦មួក ផងដែរ ។
ក្នុងការផ្តល់មួកសុវត្ថិភាពជូនកងកំលាំង នាពេលនេះ លោក ឌី រ្ន័តខេមរុណ អភិបាលរងខណ្ឌបានស្នើដល់កម្លាំងសមត្ថកិច្ចក្រោមឱវាទ ត្រូវខិតខំបំពេញតួនាទី នឹង ពង្រឹងសមត្ថភាព បន្ថែមអោយកាន់តែមានប្រសិទ្ធិភាពខ្ពស់ដើម្បីការពារសុវត្ថិភាពជូនប្រជាពលរដ្ឋនៅក្នុងមូលដ្ឋានខណ្ឌ ស្របតាមគោលនយោបាយភូមិសង្កាត់ មានសុវត្ថិភាព និង ត្រូវខិតខំដោះស្រាយ រាល់សំណូមពរ ពាក្យបណ្តឹងរបស់ ប្រជាពលរដ្ឋអោយបានល្អបន្ថែមទៀត ក៏ដូចជាការ ល្បាត ពូន ស្ទាក់ បង្ក្រាប ចាប់អោយបានលើបទល្មើស រាល់សកម្មភាពចោរកម្មផ្សេងៗដើម្បីរក្សាពង្រឹងសន្តិសុខ និង រក្សាសុវត្ថិភាពជូនប្រជាពលរដ្ឋក្នុងមូលដ្ឋានខណ្ឌ ។
លោកបានបញ្ជាក់បន្ថែមទៀតថា មន្រ្តីនគរបាល គឺជាកម្លាំងស្នូលដ៏រឹងមាំដែលកន្លងមកពួកគេបានលះបង់ទាំងកម្លាំងកាយ ចិត្ត រួមទាំងអាយុជីវិត និង ពេលវេលាជាច្រើនក្នុងការខិតខំប្រឹងប្រែងខ្នះខ្នែងរក្សានូវសន្តិសុខ ក៌ដូចសន្តិភាពជូនប្រជាពលរដ្ឋ ។ លើសពីនេះមន្រ្តីនគរបាលបានដើរតួរនាទី និងជាសេនាធិការដ៏សំខាន់របស់អាជ្ញាធរខណ្ឌទាំងមូលក្នុងសកម្មភាពបំរើប្រជាជនក្នុងការ បង្ការ ទុបស្កាត់ បង្ក្រាប បទល្មើសផ្សេងៗដូចជា អំពើលួច ឆក់ ប្លន់ និងសកម្មភាពអសន្តិសុខជាដើម។
ក្នុងពិធីផ្តល់មួកសុវត្ថិភាពនេះមានការចូលរួមពី លោក អនុសេនីយ៍ឯក ម៉ៅ សាវឿន នាយប៉ុស្តិ៍រដ្ឋបាលស្ទឹងមានជ័យទី១ និង ក្រុមការងារកង កំលាំងសរុបចំនួន២១នាក់ ក្នុងនោះស្រី ១នាក់ ។
ក្រោយពិធីសំណេះសំណាលចប់លោក ឌី រ័ត្នខេមរុណ បានផ្តល់សំភារះជូនកងកំលាំងក្នុងម្នាក់ ៗទទួលបាន មួកសុវត្ថិភាព ១ និង ថវិកាចំនួន ២០០០០រៀល សរុបទាំងអស់ មួក សុវត្ថិភាពចំនួន ១៦មួក និង ថវិកាចំនួន ៣២ម៉ឺនរៀលរួមទាំងអង្ករ ៥បាវ ផងដែរ ៕ស តារា
