ភ្នំពេញ ៖ គណបក្សប្រជាជនកម្ពុជា ដែលជាគណបក្សកាន់អំណាចនៅកម្ពុជា បានចាប់ផ្តើមបើកមហាសន្និបាតគណៈកម្មាធិការកណ្តាលបក្សរយៈពេល៣ថ្ងៃ ចាប់ពីថ្ងៃសុក្រ ៣កើត ខែមាឃ ឆ្នាំរកា ព.ស២៥៦១ ត្រូវថ្ងៃ១៩ ខែមករា រហូតដល់ថ្ងៃអាទិត្យ ៥កើត ខែមាឃ ត្រូវនឹងថ្ងៃទី២១ ខែមករា ឆ្នាំ២០១៨។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានប្រាប់អោយដឹងថា នៅថ្ងៃទី១៨ ថាមហាសន្និបាត ដែលធ្វើឡើងក្រោមអធិបតីភាព សម្តេចតេជោ ហ៊ុន សែន ប្រធានគណបក្សប្រជាជនកម្ពុជា នឹងមានការអញ្ជើញចូលរួមពី ថ្នាក់ដឹកនាំ និងសមាជិក សមាជិកាជាង ២ពាន់នាក់។
លោក សុខ ឥសាន មិនបានបង្ហាញពីរបៀបវារៈនៃមហាសន្និបាត ក្នុងរយៈពេល៣ថ្ងៃនេះឡើយ។ ឆ្នាំ២០១៨ ជាឆ្នាំចុងក្រោយនៃការដឹកនាំរបស់គណបក្សប្រជាជនកម្ពុជា នីតិកាលទី៥ នៃរដ្ឋសភា ហើយក៏ជាឆ្នាំ ដែលនឹងត្រូវរៀបចំការបោះឆ្នោតជ្រើសរើសតំណាងរាស្ត្រអាណត្តិទី០៦ផងដែរ ដូច្នេះមហាសន្និបាតរបស់គណបក្សប្រជាជនកម្ពុជារយៈពេល៣ថ្ងៃនេះ របៀបវារៈស្តីពីការរៀបចំខ្លួនឆ្ពោះទៅកាន់ការបោះឆ្នោត ត្រូវបានគេមើលឃើញជារបៀបវារៈដ៏សំខាន់ដែលនឹងត្រូវ លើកយកមកពិភាក្សា។
ក្នុងកិច្ចសំណេះសំណាលជាមួយកម្មករ កម្មការិនី នៅថ្ងៃទី១៧ ខែមករា ឆ្នាំ២០១៨ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រមុខបក្សកាន់អំណាច បានឲ្យដឹងថា មហាសន្និបាត នឹងពិភាក្សាផ្តោតជាសំខាន់លើការរៀបចំក្របខ័ណ្ឌគោលនយោបាយរបស់គណបក្សពីឆ្នាំ២០១៨ ដល់ឆ្នាំ២០២៣ សម្រាប់នីតិកាលថ្មីនៃរដ្ឋសភា ដែលនឹងត្រូវបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ខាងមុខដ៏ខ្លីនេះ។
គណបក្សប្រជាជនកម្ពុជា គឺជាគណបក្សនយោបាយដែលមានរចនាសម្ព័ន្ធដឹកនាំរឹងមាំនៅកម្ពុជា ហើយបានដឹកនាំនាវាកម្ពុជាចាប់តាំងពីកម្ពុជាត្រូវបានរំដោះចេញពីរបបប្រល័យពូជសាសន៍ ប៉ុល ពត នាថ្ងៃទី០៧ ខែមករា ឆ្នាំ១៩៧៩ ក្រោមចលនាខ្មែរអ្នកស្នេហាជាតិ ដែលដឹកនាំដោយថ្នាក់ដឹកនាំគណបក្សប្រជាជនកម្ពុជានោះ។ គណបក្សប្រជាជនកម្ពុជា មានឈ្មោះដើមថា បក្សប្រជាជន បដិវត្ដន៍ខ្មែរ បានបដិសន្ធិឡើងនៅថ្ងៃទី២៨ ខែមិថុនា ឆ្នាំ១៩៥១ ដោយមានប្រភពពីចលនាតស៊ូរបស់ប្រជាជនកម្ពុជា ប្រឆាំងពួកអាណានិគមនិយមដើម្បីឯករាជ្យជាតិ។
គណបក្សប្រជាជនកម្ពុជា ធ្លាប់បានបញ្ជាក់ថា ចាប់តាំងពីថ្ងៃបដិសន្ធិមកគណបក្សប្រជាជនកម្ពុជា បានប្រកាន់ខ្ជាប់ជានិច្ចនូវគោលបំណង និងឧត្តមគតិរបស់ខ្លួន គឺឈរនៅខាងប្រជាជនផ្សារភ្ជាប់ រួមសុខទុក្ខជាមួយប្រជាជន ពុះពារជម្នះគ្រប់ឧបសគ្គ ហ៊ានធ្វើពលិកម្មឥតរុញរា ដើម្បីកម្ពុជា ឯករាជ្យ សន្ដិភាព សេរីភាព ប្រជាធិបតេយ្យ អព្យាក្រឹត្យ និងវឌ្ឍនភាពសង្គម។ ក្នុងកាលៈទេសៈដែលប្រទេសជាតិត្រូវធ្លាក់ក្នុងគ្រោះមហន្ដរាយប្រល័យពូជសាសន៍ ដែលរបបកម្ពុជាប្រជាធិបតេយ្យបានបង្កឡើងចាប់ពីខែមេសា ឆ្នាំ១៩៧៥ គណបក្សប្រជាជនកម្ពុជា គឺជាកម្លាំងនយោបាយតែមួយគត់ ដែលបានក្រោកឈរតស៊ូហើយបានប្រមូលផ្ដុំរាល់កម្លាំងស្នេហាជាតិ បង្កើតឡើងរណសិរ្សសាមគ្គីសង្គ្រោះជាតិកម្ពុជា ដើម្បីបំផុស និងដឹកនាំចលនាប្រជាជននៅទូទាំងប្រទេសវាយផ្ដូលរំលំរបបដ៏យង់ឃ្នងនេះ។
លើសមរភូមិប្រជាធិបតេយ្យនៃការបោះឆ្នោតចាប់តាំងពីឆ្នាំ១៩៩៣មក គណបក្សដ៏ធំនៅកម្ពុជាមួយនេះ បានចាក់ការបោះឆ្នោតតែម្តងគត់ នៅក្នុងឆ្នាំ១៩៩៣ ដែលជាដំណើរការ បោះឆ្នោតលើកដំបូងក្រោយកម្ពុជាបញ្ចប់ភ្លើងសង្គ្រាម។ ប៉ុន្តែចាប់តាំងពីឆ្នាំ១៩៩៨ ដែលជាអាណត្តិទី២ នៃការបោះឆ្នោត គឺគណបក្សមួយនេះទទួលបាន ការគាំទ្រច្រើនលើស លុបឈានដឹកនាំរាជរដ្ឋាភិបាលតែឯងជាបន្តបន្ទាប់មកដល់សព្វថ្ងៃ៕ ប្រាថ្នា
