ខេត្ដឧត្ដរមានជ័យ៖ ស្ដ្រីពីនាក់ដែល គេឃើញដឹកជញ្ជូនឈើប្រណីតប្រភេទ ឈើបេងនិងឈើធ្នង់តាមរម៉កម៉ូតូយ៉ាងសកម្មក្នុងមួយថ្ងៃពីទៅបីជើងចេញពីឃុំអូរស្វាយ ស្រុកត្រញំងប្រាសាទចូលមក ស្រុកអន្លង់វែងដែលសមត្ថកិច្ចមិនមានចំណាត់ការកំពុងតែអួតក្ដែងៗថាគ្មាន អ្នកណាហ៊ានបង្ក្រាបគេឡើយ ។
តាមការឱ្យដឹងពីសមត្ថកិច្ចថា ស្ដ្រី ទាំង២នាក់ដែលប្រកបអាជីវកម្មបទល្មើសព្រៃឈើខាងលើ ទី១-ឈ្មោះចែ ផល្លា អាយុ៣៦ឆ្នាំ និងទី២-មិនស្គាល់ឈ្មោះទេ អ្នកទាំង២រស់នៅភូមិ ទួលចំបក់ ឃុំ អូរស្វាយ ស្រុកត្រញំងប្រាសាទ ខេត្ដឧត្ដរ មានជ័យ ។
ប្រជាពលរដ្ឋនៅភូមិស្រះឈូក និង ភូមិអូរចិញ្ចៀន ឃុំស្រុកអន្លង់វែងបានឱ្យ ដឹងថាស្ដ្រីពីនាក់ខាងលើមិនត្រឹមតែរកស៊ីបទល្មើសព្រៃឈើ ហើយសមត្ថកិច្ច ជំនាញរដ្ឋបាលព្រៃឈើស្រុកអន្លង់វែង មិនហ៊ានបង្ក្រាបប៉ុណ្ណោះទេ ថែមទាំងពូកែ ខាងដើរឆបោកគេឯងពេញស្រុកអន្លង់ វែងថែមទៀត ។ ស្ដ្រីទាំង២នាក់នេះបាន យកឈើលេខ២មុខកាត់ធំៗមកដើរបន្លំ គេថាជាឈើបេងដែលទិញតម្លៃ៥០ម៉ឺន រៀលក្នុងមួយម៉ែត្រគូបយកមកលក់តម្លៃរាប់ពាន់ដុល្លារ ។
នេះបើតាមសម្ដីប្រជាពលរដ្ឋដែលចាញ់បោកស្ដ្រី២នាក់ខាងលើម្នាក់ៗអស់រាប់ពាន់ដុល្លារហើយពួកគាត់កំពុងតែ ប្ដឹងសមត្ថកិច្ចឱ្យចាប់ខ្លួនស្ដ្រីទាំង២នាក់ នេះទៅកាត់ទោស ។ បើតាមការឱ្យដឹងពី មន្ដ្រីសង្កាត់រដ្ឋបាលព្រៃឈើស្រុកអន្លង់ វែងថាថ្មីៗនេះពួកគាត់បានស្ទាក់ចាប់ រ៉ឺម៉កដឹកឈើនេះដែរតែស្ដ្រី២នាក់នេះ បានស្រែកឡូឡារួចយកស៊ាំងមកចាក់ លើឈើនិងម៉ូតូគំរាមដុតបំផ្លាញចោល រួចជេរប្រមាថសមត្ថកិច្ចតាមតែអំពើចិត្ដ ។ ស្ដ្រីទាំង២នាក់នេះបានឱ្យដឹងថា មានមន្ដ្រីបរិស្ថានម្នាក់ជាអ្នកនៅពី ក្រោយខ្នងនិងជាអ្នករៀបចំគម្រោងឱ្យធ្វើបែបនេះ ពីព្រោះរូបគាត់បានបង់លុយឱ្យ ទៅមន្ដ្រីបរិស្ថានជាប្រចាំតែស្ដ្រីទាំង ២នាក់នេះមិនបានប្រាប់អំពីអត្ដសញ្ញាណមន្ដ្រីបរិស្ថាននេះឡើយ ៕
ដោយ៖ ប៉ែន នួន
