ខេត្តកំពង់ចាម ៖ អ្នកធ្វើដំណើរជាច្រើននាក់ ខណះកំពុងជិះលើរថយន្តក្រុងមួយគ្រឿងក្នុងនោះមាន ខ្មែរ និង បរទេសផងនោះ បានភ័យស្រែកស្លន់ស្លោរ ដោយសារបុរសអ្នកដំណើរម្នាក់ ដែលឈ្លោះជាមួយប្រពន្ធ បានក្រោកដើទៅជិតតៃកុងរថយន្តហើយស្ទុះទាញបួងចង្កូតរថយន្ត ដែលកំពុងបើកបរនៅលើផ្លូវជាតិលេខ៦ អា បណ្តាលឲ្យជ្រុលឡើងខឿនសួនច្បារទ្រូងផ្លូវប៊ិះនិងក្រឡាប់ ។
ហេតុការដ៏លស់ព្រលឹងនេះកើតឡើងនៅវេលាម៉ោង ៩:៣០ នាទីព្រឹក ថ្ងៃច័ន្ទ ៥រោច ខែ មាឃ ឆ្នាំរកា នព្វស័ក ព.ស២៥៦១ ត្រូវនិងថ្ងៃទី៥ ខែកុម្ភ: ឆ្នាំ២០១៨ លើកំណាត់ផ្លូវជាតិលេខ៦ អា ត្រង់ចំណុចគីឡូលេខ៧០ ក្នុងភូមិរវៀង ឃុំខ្នុរដំបង ស្រុកជើងព្រៃ ខេត្តកំពង់ចាម ។
លោកវរសេនីយ៍ ប្រាក់ សុគន្ធ អធិការនគរបាលស្រុកជើងព្រៃបានឲ្យដឹងថា រថយន្តក្រុងដឹកអ្នកដំណើរ ដែលជួបហេតុការនេះ ម៉ាកហ៊ីយ៉ានដាយ១គ្រឿង ពាក់ស្លាកលេខ ភ្នំពេញ 3A-1863 បើកបរដោយឈ្មោះ ភុំ ណាក់ ភេទប្រុស អាយុ២៥ឆ្នាំ នៅភូមិចុងដូង ឃុំចុងដូង ស្រុកបារាយរណ៍ ខេត្តកំពង់ធំ ។ បានដឹកអ្នកដំណើរខ្មែរ និងបរទេសពេញរថយន្ត ចេញពីរាជធានីភ្នំពេញដើម្បីឆ្ពោះទៅកាន់ទឹកដីអង្គរខេត្តសៀមរាប។
លោកបន្តថា តាមសាក្សីដែលជាអ្នកដំណើរលើរថយន្តបានឲ្យដឹងថា ក្នុងខណះពេលមកជិតដល់កន្លែងកើតហេតុ ស្រាប់តែ អ្នកដំណើរម្នាក់ឈ្មោះ សំ សុជាន ភេទប្រុស អាយុ៣០ឆ្នាំ រស់នៅភូមិគោកចាន់ ឃុំតាសោម ស្រុកអង្គជុំ ខេត្តសៀមរាប បានឈ្លោះជាមួយប្រពន្ធឈ្មោះ តឹប នីន អាយុ២៩ឆ្នាំ ហើយដើរទៅជិតតៃកុងរថយន្ត និងស្ទុះទៅចាប់ទាញចង្កូតរថយន្តក្រុង ដែលកំពុងបើកបរតាមផ្លូវជាហេតុធ្វើឲ្យរថយន្តរេពេញផ្លូវ និងបានបុកឡើងលើសួនច្បារដាំលំអរទ្រូងផ្លូវទើបលែងទៅមុខ ជាមួយហេតុការដ៏ញាក់សាច់លស់ព្រលឹងនេះ ក៏ធ្វើរឲ្យអ្នកដំណើរលើរថយន្តក្រុង មានខ្មែរ និងបរទេស នាំគ្នាភ័យស្លន់ស្លោស្រែកពេញរថយន្ត ។
លោកអធិការក៏បានបន្ថែមថា ចំណែកជនបង្ករ ដោយសារហេតុតែខឹងពេកត្រូវបានអ្នកធ្វើដំណើរនាំគ្នាវាយបណ្តាលឲ្យបែកច្រមុះនិងមុខមាត់ផងដែរ ។
លោកអធិការក៏បានបញ្ជាក់ឲ្យដឹងដែរថា ករណីនេះជនបង្ករក្រោយកើតហេតុត្រូវបានបញ្ជូនទៅកាន់អធិការដ្ឋាននគរបាលស្រុកជើងព្រៃ ដើម្បីសួរនាំ ហើយតាមតាមរយៈការធ្វើតេស្តទឹកនោម ក៏បានរកឃើញមានសារធាតុញៀននៅក្នុងខ្លួនផងដែរ។
បច្ចុប្បន្នជនបង្កខាងលើបានបញ្ជូនមកដល់ផែនកណ្តាលព្រហ្មទណ្ឌនៃស្នងការដ្ឋាននគរបាលខេត្តកំពង់ចាមរួចហើយនៅព្រលប់នេះ នឹងត្រៀមបញ្ជូនទៅសាលាដំបូងខេត្តចាត់ការតាមច្បាប់ ៕ វណ្ណៈ
