ភ្នំពេញ ៖ ជនសង្ស័យម្នាក់ត្រូវឃាត់ខ្លួន ក្រោយពីធ្វើសកម្មភាពកាប់ប្រហារទៅលើលោកមេប៉ុស្តិ៍នគរបាលព្រែកព្នៅម្នាក់ បណ្តាលឱ្យរងរបួសដាច់.កដៃម្ខាង ខណៈលោកចូលទៅអន្តរាគមន៍ ក្នុងពេលជនសង្ស័យរូបនោះបង្កហិង្សាក្នុងគ្រួសារកាលពីវេលាម៉ោង១០ព្រឹក ថ្ងៃពុធ ៦រោច ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី៧ ខែមីនា ឆ្នាំ២០១៨ ស្ថិតត្រង់ចំណុចមុខផ្ទះគ្មានលេខ លើផ្លូវជាតិលេខ៥ ក្នុងភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។
ជនសង្ស័យខាងលើឈ្មោះអំ ដាលីន អាយុ៣០ឆ្នាំ មុខរបរមិនពិតប្រាកដ មានទីលំនៅក្នុងភូមិកើតហេតុ ។ រីឯជនរងគ្រោះឈ្មោះអ៊ឹម រិទ្ធី អាយុ៣៦ឆ្នាំ ជានាយប៉ុស្តិ៍នគរបាលព្រែកព្នៅស្តីទី មានទីលំនៅក្នុងភូមិកណ្តាល សង្កាត់ព្រែកព្នៅ ខណ្ឌព្រែកព្នៅរបួសដាច់.កដៃខាងឆ្វេង។
ជនសង្ស័យខាងលើ គឺជាមនុស្សញៀនថ្នាំ ហើយត្រូវក្រុមគ្រួសារបញ្ជូនទៅមណ្ឌលកែ ប្រែប្រភពបានអោយដឹងថា ក្រោយមក ជនសង្ស័យរូបនេះបានប្រើល្បិចធ្វើជាឈឺ ឱ្យគេបញ្ជូនទៅមន្ទីរពេទ្យ ស្រាប់តែបានរត់គេចខ្លួនបាត់ ។ លុះនៅថ្ងៃកើតហេតុ ជននេះបានមករករឿងក្រុមគ្រួសារយ៉ាងខ្លាំង ហើយក៏មានអ្នកជិតខាងជួយរាយការណ៍ទៅកម្លាំងសមត្ថកិច្ច ទើបត្រូវលោកមេប៉ុស្តិ៍ដែលជាជនរងគ្រោះ ដឹកនាំកម្លាំងចុះទៅអន្តរាគមន៍នៅផ្ទះកើតហេតុ ។ គ្រាន់តែក្រឡេកឃើញ កម្លាំងសមត្ថកិច្ចភ្លាម ជននោះក៏ទាញកាំបិតដេញកាប់រហូតត្រូវជនរងគ្រោះរងរបួសតែម្តងត្រូវបញ្ជូនទៅសង្គ្រោះនៅមន្ទីរពេទ្យផងដែរ ៕ ធឿនព្រែកជ័យ
