ខេត្តកណ្តាល ៖ រឿងដីច្រាំងទន្លេ​ដែលបាក់ជាបណ្តើរៗនៅពេលដែលរដូវទឹកឡើង​រយៈពេលកន្លងមក ស្ថិតនៅក្នុងឃុំព្រែកអំពិល ស្រុកខ្សាច់កណ្តាល ខេត្តកណ្តាល វាជារឿងគ្រោះធម្មជាតិ ដែល​គ្មានមនុស្សណាម្នាក់ចង់​បាន និងជួប​វានោះឡើយ ផ្ទុយទៅវិញមានគ្រួសារមួយ​បានទៅទិញដីលំនៅឋានដែលមានហ៊ុំព័ទ្ធរបងជុំវិញ ហើយមានការទទួល​ស្គាល់ពីអាជ្ញាធ ភូមិ ឃុំ ត្រឹមត្រូវនៅលើផ្លូវច្បាប់នៃអចលនវត្ថុនេះ ។ ប៉ុន្តែ​ពេលដែល​គ្រួសារគាត់បានទិញដីលំនៅឋានខាងលើនេះរួចមក ក៏មានជនមួយក្រុម​លេចមុខរួច​ចាប់ផ្តើម​សាងសង់រោង​ឈើប្រក់ស័ង្កសីនៅលើដីច្រាំងទន្លេ​ខាងក្រោយដីរបស់គាត់ រួចហើយ​បានបំប៉ោង​និងសរសេរ​ភូតភរកុហក់មហាជន​ថា អ្នកដែលមានដីពិតប្រាកដ​ទទួលស្គាល់ដោយអាជ្ញាធរ បែរជារំលោភនិងចាក់យកផ្លូវទៅវិញ ។

រឿងទំនាស់ដីច្រាំងទន្លេខាងលើនេះ វាបានអូសបន្លាយរហូតអស់រយៈពេលជិត៣ខែ ហើយជនរងគ្រោះ​ដែលជាម្ចាស់ដីកម្មសិទ្ធិស្របច្បាប់ឈ្មោះ មួន ចាន់ហៀក បានធ្វើលិខិត និងពាក្យប្តឹងទៅអាជ្ញាធរភូមិ ដើម្បីឲ្យជួយដោះស្រាយ​លើបញ្ហាខាងលើនេះ ។ បន្ទាប់ពីបានទទួលពាក្យបណ្តឹង អាជ្ញាធរ​បានកោះហៅភាគីទាំងសងខាងដើម្បីឲ្យចូលតទល់មុខគ្នានៅក្នុងសាលាឃុំ​ តែភាគីម្ខាងទៀត​ដែល​សង់រោង​រំលោភយកដីច្រាំងទន្លេដើម្បីមកគ្រប់គ្រងធ្វើជាកម្មសិទ្ធិរបស់ខ្លួននេះ ហាក់បីមិនរវីរវល់ហើយបានបោះពាក្យសម្តីមិនពិរោះទៅលើភាគីម្ខាងទៀត ក៏ដូចជា​នៅចំពោះមុខ​អាជ្ញាធរ ។

នៅព្រឹកថ្ងៃអង្គារ ១០កើត ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៤ ខែមេសា ឆ្នាំ២០១៨ អាជ្ញាធរឃុំព្រែកអំពិលបានអញ្ជើញភាគីទាំងពីរ​ចូលដោះស្រាយគ្នានៅទល់មុខសាលាឃុំ​ដើម្បីរកដំណោះស្រាយ ដែលភាគី​ម្ចាស់ដីស្របច្បាប់ឈ្មោះ មួន ចាន់ហៀក និងប្តី រីឯភាគីដែលសាងសង់រោង​ប្រក់ស័ង្កសី​រំលោភដីច្រាំងទន្លេ​ខាងក្រោយដី​របស់​លោកស្រី មួន ចាន់ហៀកនោះ មានឈ្មោះ ទេស វិបុល ហៅម៉ាប់ មានទីលំនៅ​ក្នុង​ឃុំព្រែកអំពិល ស្រុកខ្សាច់កណ្តាល ខេត្តកណ្តាល ។ ខណៈដែល​ជួបជុំគ្នាដើម្បីរកដំណោះស្រាយនៅក្នុងសាលាឃុំ ក៏មានការចូលរួម​ពីលោកមេឃុំព្រែកអំពិល ឈឹម ម៉េង ជំទប់ទី១ ទី២ សមាជិក សមត្ថកិច្ច រួមជាមួយនឹងអ្នកយកព័ត៌មាន​ជាច្រើនរូបផងដែរ ។

ក្រោយពី​ភាកីនីមួយៗលើកឡើងបង្ហាញអំពីឯកសារដើម្បីជា​ភស្តុតាងសម្រាប់បញ្ជាក់ថា តើមួយណាជាអ្នកខុស មួយណាជាអ្នកត្រូវ ផ្ទុយទៅវិញភាគី​ម្ចាស់ដីស្របច្បាប់ឈ្មោះ មួន ចាន់ហៀក​បានលើកឯកសារបង្ហាញប្រាប់អាជ្ញាធរគ្រប់លំដាប់ថ្នាក់ រីឯភាគីម្ខាងទៀតឈ្មោះទេស វិបុល ហៅម៉ាប់ ពុំមានលើកឯកសារអ្វីបង្ហាញ​ក្រៅតែពីនិយាយដីរបស់គាត់​រស់នៅតាំងពីជីដូនជីតា តាំងពី១៩៩៤មកម្ល៉េះ តែធាតុពិត ដីទាំងនោះត្រូវបានធម្មជាតិ​លេបត្របាក់ធ្លាក់ចូលទន្លេ​អស់ទៅហើយ បែរជា​មកសាងសង់រោងខាងក្រោយដីរបស់គេទៅវិញ ។

ជាមួយនឹងការ​ហៅមកដោះស្រាយរវាងភាគីទាំងពីរ​ អាជ្ញាធរឃុំបានបញ្ជាក់ថា ពេលនេះ អាជ្ញាធរមិនមែនជាតុលាការនោះទេ ហើយក៏មិនអាច​កាត់រឿងនេះឲ្យទៅភាគីណាមួយជាអ្នកឈ្នះឡើយ តែក្នុងនាមជាអាជ្ញាធរ មានតែភាព​សម្រុះសម្រួល ការយោគយល់គ្នាដើម្បីបញ្ចប់រឿង​កុំឲ្យមានវិវាទបន្តទៅមុខទៀត ហើយឈរនៅលើភាពឈ្នះឈ្នះទាំងអស់គ្នា ។

ក្រោយពីបានជជែកវែកញែក​អស់រយៈពេលជិត២ម៉ោងកន្លងមក ហាក់បីដូចជាមិនត្រូវគ្នារវាងភាគីទាំងពីរ ធ្វើឲ្យភាគីខាងទេពវិបុល ហៅម៉ាប់ មានការខឹងសម្បារយ៉ាងខ្លាំងនៅក្នុងអង្គប្រជុំ មុខអាជ្ញាធរឃុំ ហាក់បីដូចជាដឹងថា ខ្លួនមានកំហុស តែផ្ទុយទៅវិញ ទេស វិបុល នៅតែទុកខ្លួនឯងជាអ្នកខ្លាំងនៅក្នុងភូមិក្របៅ៣ ឃុំព្រែកអំពិល ដដែល ។

ដោយមើលឃើញភាពមិនប្រក្រតីបែបនេះ គណៈកម្មការសាលាឃុំ​ក៏បានសម្រេចបញ្ចប់ការប្រជុំ​ដោយលើកទៅពេលក្រោយ ៕ អរុណរះ